«Áziret Sultan» shákirtteri arasynda Quran jarysy ótti (FOTO)
Búgin, qasıetti juma kúni respýblıkalyq «Áziret Sultan» meshitinde shákirtter arasynda Quran jarysy bolyp ótti. Qasıetti Ramazan qarsańynda uıymdastyrylyp otyrǵan aıtýly jarysqa «Áziret Sultan» meshitindegi Dinı saýat ashý kýrsynda tálim alatyn 170 shákirttiń arasynan sýyrylyp shyqqan 7 úmitker qatysyp, juma namazynan soń jamaǵat aldynda óz ónerlerin pash etti.
Quran jarysyna qazylyq jasap, jeńimpaz anyqtaýǵa respýblıkalyq «Áziret Sultan» meshitiniń naıb ımamy Qanat Qydyrmın, «Nur Astana» meshitiniń naıb ımamy, qarı Ádilhan Imanáliuly, «Astana» medrese-kolledjiniń ustazy Abdýsamıǵ Álı myrzalar shaqyrylyp, jarys tóreligi usynyldy.
Aıta keteıik, búgin «Áziret Sultan» meshitindegi Dinı saýat kýrsy óz jumysyn aıaqtap, shákirtterge sertıfıkat tabystalatyn bolmaq. Osy oraıda búgingi Quran jarysy shákirtterdiń jyl boıǵy ilim jolyndaǵy izdenisteriniń, jınaǵan bilim-biliktilikteriniń esebindeı boldy.
Ádilqazylar alqasynyń túrli suraqtaryn múdirmeı jalǵastyryp áketip, qasıetti Quran aıattaryn qanshalyqty jatqa biletindikterin dúıim jurttyń aldynda dáleldegen qatysýshylardyń qarym-qabileti shynynda kóńil toıdyryp, kóz súısintti. Degenmen, qazylar alqasynyń árbir úmitkerdiń jattaý sheberligine, tájýıdi men oqý mánerlerin saraptaı kele arasynan shyn júırigin anyqtaýǵa tyrysty.
Saıys qorytyndysy boıynsha júldeli III-orynǵa Tóregeldi Temirtas laıyq dep tanyldy. Al, II-oryn júldesi Jakıpov Bekzatqa buıyrdy. «Áziret Sultan» meshiti shákirtteri arasynda jyl saıyn dástúrli túrde ótetin Quran jarysynyń bıylǵy jeńimpazy Erboluly Meıirbek atandy. Qalǵan qatysýshylardyń barlyǵyna arnaıy «Yntalandyrýy» syılyǵy berilip, aqtyq aınalymǵa jetken jetistikteri úshin «Alǵys hatpen» marapattaldy.
Júldegerler marapatyn óz qolymen tabystaǵan QMDB tóraǵasynyń birinshi orynbasary, naıb múftı Naýryzbaı qajy Taǵanuly búgingi Quran jarysynyń mańyzdylyǵyna toqtalyp, osyndaı shákirt tárbıelep, urpaq tárbıesine ólsheýsiz úles qosyp kele jatqan meshit ımamdary men ustazdaryna alǵysyn bildirdi.
Sýretter toptamasyn «FOTOGALEREIa» aıdarynan kóre alasyzdar!
