BAÁ elshisi «Áziret Sultan» meshitine tartý jasady (FOTO)

Búgin Astana qalasyndaǵy respýblıkalyq «Áziret Sultan» meshitindegi oqý dárishanalarynyń qural-jabdyqtary jańartyldy. Birikken Arab Ámirliginiń Qazaqstandaǵy tótenshe jáne ókiletti elshisi Mýhammad Ahmad ál-Jaber myrzanyń bastamasymen qasıetti Ramazan aıynda «Áziret Sultan» meshitiniń oqý dárishanalaryna 60 oryndyq tartý etildi.

Elimizdiń eń alyp qulshylyq orny ǵana emes, bilim men ǵylymnyń otyn mazdatqan biregeı oqý ordasyna aınalǵan «Áziret Sultan» meshitine tartý etilgen bul syılyq – Bas meshittegi bilim sapasyna berilgen laıyqty baǵasyndaı boldy. Dál osy dárishanalarda jyl saıyn 500-ge jýyq shákirt dinı saýat ashyp, bilim alyp keledi. Ashylǵanyna alty jylǵa jýyqtaǵan Bas meshitten bul kúnde bilim alyp shyqqan shákirtter sany 2000-nan erkin asyp jyǵylady.

Osy sebepti de qasıetti Ramazan aıyndaǵy qaıyrymdylyqty Bas meshitke arnaǵandy jón sanaǵan BAÁ elshisi Mýhammad Ahmad ál-Jaber arnaıy meshitke kelip, jyly lebizin bildirip qaıtty. QMDB tóraǵasynyń birinshi orynbasary, naıb múftı, «Áziret Sultan» meshitiniń bas ımamy Naýryzbaı qajy Taǵanuly qurmetti qonaqty ózi qarsy alyp, qabyldaý ótkizdi. Qulshylyq ordasynyń tynys-tirshiligimen tanystyryp, irgeli jobalar jaıynda májilis qurǵan kezdesýden soń qurmetti elshi dárishanalarǵa kirip, jazǵy saýat ashý kýrsy shákirtterine izgi tilegin joldady. Sondaı-aq, qulshylyq ordasyndaǵy naıb ımamdar bólmesi men Muslim.kz caıtynyń redaktsııasy jáne Hıkmet teleradıostýdııasyna bas suǵyp, jumys jaıymen tanysyp qaıtty. sapar sońynda «Áziret Sultan» meshitiniń tómengi qabatyndaǵy meıramhanaǵa bas suǵyp, kún saıyn 800 janǵa tegin berilip kele jatqan aýyzashar dastarhanyn da tamashalap ótti.