BARShAŃYZǴA MYŃ ALǴYS!
Qurmetti otandastar!
Sizderdi búgingi alǵys aıtý kúnimen shyn júrekten quttyqtaımyn. Ár otbasyǵa qut-bereke, baqyt pen tabys tileımin.
Ardaqty Paıǵambarymyz Muhammed (oǵan Allanyń salaýaty men sálemi bolsyn): «Adamǵa alǵys aıta almaǵan, Allaǵa shúkir ete almaıdy», – degen.
Bizdi joqtan bar etken Allaǵa sansyz shúkirler bolsyn! Ulanǵaıyr jerimizdi qorǵap, bizge amanat etip qaldyrǵan babalarymyzǵa, meıirimin tógip, mápelep ósirgen ata-anamyzǵa, qamqor bolǵan aǵaıyn-týysqa alǵys aıtamyn.
Men osy rette «qasiretti qańtar» kezinde eńsesin túsirmeı, birligin tanytqan halqymyzǵa aıryqsha alǵys bildiremin. Jurtymyzǵa qamqor bolǵan el qamyndaǵy azamattarǵa, syndarly sátte din qyzmetkerleriniń birlik pen izgilikke úndegen nasıhatyn tyńdap, yntymaqqa uıysqan meshit jamaǵatyna Alla razy bolsyn deımin. Sizderge rııasyz rızalyq nıetimdi jetkizemin.
Qadirli jamaǵat!
Hadısterdiń birinde: «Kim senderge jaqsylyq jasasa, oǵan syılyq berińder. Eger berer syılyq tappasańdar, ol úshin duǵa jasańdar», – delingen. Musylman qaýymyn qańtar oqıǵasy kezinde Otanyn qorǵap, jan tapsyrǵan azamattarǵa, beıbit turǵyndarǵa, sonymen qatar elimiz ben jerimizdiń, barsha álem halqynyń tynyshtyǵy men tatýlyǵy úshin duǵa jasaýǵa úndeımin. Alla Taǵala halqymyzdy túrli synaqtan saqtap, jaqsylyǵyn jaýdyrǵaı. Ámın!
Naýryzbaı qajy TAǴANULY
Qazaqstan musylmandary dinı basqarmasynyń tóraǵasy, Bas múftı
