BAS IMAM: «ÁR ISKE ShYNAIY YQYLAS – QYZMETIMIZDIŃ ÓLShEMI BOLÝY TIIS»
Astana qalasynyń bas ımamy Nurbek qajy Áýeshanuly elordadaǵy «Nursultan» meshitinde din qyzmetkerlerimen kezdesip, «Ár iske shynaıy yqylas» taqyrybynda nasıhat aıtty.
Kezdesý barysynda qala bas ımamy elordanyń eń iri qulshylyq ordalarynyń biri sanalatyn «Nursultan» meshitine kelýshiler qatary jyldan-jylǵa artyp kele jatqanyn atap ótip, mundaı meshittiń tek qulshylyq orny ǵana emes, Qazaqstannyń rýhanı kelbetin tanytatyn mańyzdy ortalyq ekenin aıtty.
Osyǵan baılanysty ol jamaǵat pen týrısterge qolaıly jaǵdaı jasaý, qyzmet kórsetý mádenıetin jetildirý jáne meshittiń tazalyǵyna erekshe mán berý qajettigin jetkizdi. Ásirese kireberisten bastap namaz zalyna deıingi barlyq aýmaqtyń, murajaıdyń, kitap dúkeni men munaraǵa kóteriletin bóliktiń uqypty bolýy, al meshit qyzmetkerleriniń árbir kelýshini jyly júzben qarsy alýy mańyzdy ekenin atap ótti.
«Bizdiń ár isimizdiń ólshemi – shynaıy yqylas bolýy kerek. Dáris bolsyn, qaıyrymdylyq bolsyn, meshittiń tazalyǵy nemese jamaǵatqa qyzmet kórsetý bolsyn – bári Alla razylyǵy úshin atqarylýy tıis. Nıet túzelse, qyzmetimizdiń de berekesi artady», – dedi Nurbek qajy Áýeshanuly.
Sondaı-aq Bas múftı Naýryzbaı qajy Taǵanulynyń tóraǵalyǵymen ótken Tóralqa otyrysynda júktelgen mindetterge toqtalyp, meshit qyzmetin zań talaptaryna saı júrgizý, dinı ádebıetterge baqylaýdy kúsheıtý, jat aǵymnyń aldyn alý, jastarmen jáne aqparattyq-aǵartýshylyq baǵyttaǵy jumysty júıeleý máselelerin kóterdi.
Sonymen qatar aldaǵy qaıyrymdylyq jobalaryn birlesip uıymdastyrý, meshit ustazdarynyń turaqty dáristerin jolǵa qoıý jáne olardyń mazmunyn áleýmettik jeliler arqyly keńinen nasıhattaý qajettigin aıtty.
Kezdesý barysynda qala bas ımamy meshit janyndaǵy «Órnek» tigin sheberhanasyn, kitaphanany, dárishanalardy, neke qııý jáne Quran baǵyshtaý rásimderine arnalǵan zaldardy, sondaı-aq Otbasylyq keńes berý ortalyǵyn aralap, olardyń jumys barysymen tanysty. Ár baǵyt boıynsha atqarylyp jatqan jumystarǵa oń baǵasyn berip, meshittiń mádenı-rýhanı, aǵartýshylyq jáne áleýmettik qyzmetin odan ári jandandyrýdy tapsyrdy.
Kezdesý sońynda Nurbek qajy Áýeshanuly jamaǵatqa ýaǵyz-nasıhat jasap, besin namazyn ótkizdi.
Sýretterdi «FOTOGALEREIa» aıdarynan kóre alasyzdar!
Источник: Aisha
