BAS IMAM: «BILIMDI JASTAR – EL BOLAShAǴY»
Búgin Astana qalasynyń bas ımamy Nurbek qajy Áýeshanulynyń qatysýymen «Áziret Sultan» meshitinde «Bilimdi jastar – el bolashaǵy» taqyrybynda jastar isine jaýapty mamandarǵa arnalǵan jıyn ótti.
Sondaı-aq, jıynǵa Qazaqstan musylmandary dinı basqarmasynyń Jastar isi sektorynyń meńgerýshisi Baǵyjan Erbolatuly, Astana qalasy Jastar isi sektorynyń jetekshisi Shalqar Joldy jáne elorda meshitteriniń jastar isine jaýapty mamandary men din qyzmetkerleri qatysty.
Qala bas ımamy jastarmen júıeli jumys júrgizýdiń mańyzyna toqtalyp, olardyń dinı saýatyn arttyrý, dástúrli ıslam qundylyqtaryn nasıhattaý jáne rýhanı-adamgershilik tárbıeni kúsheıtý – búgingi kúnniń basty mindetteriniń biri ekenin aıtty.
«Jastyq shaq – bilim men tárbıeniń irgetasy qalanatyn eń qymbat kezeń. Jas kezde alǵan bilim de, jattaǵan Quran da ómir boıy adamnyń serigi bolady. Sondyqtan jastardyń ýaqytyn paıdaly ilimge, izgilikke jáne elge qyzmet etýge baǵyttaıyq», – dedi Nurbek qajy Áýeshanuly.
Bas ımam sondaı-aq qazirgi aqparattyq keńistikte jastardyń túrli ıdeologııalyq yqpalǵa jıi ushyraıtynyn aıtyp, meshit qyzmetkerlerin olardyń synı oılaý qabiletin qalyptastyrýǵa, jat aǵymdardyń aldyn alýǵa jáne dástúrli ıslamdy kórkem nasıhattaýǵa basa mán berýge shaqyrdy.
Jıyn barysynda QMDB Jastar isi sektorynyń meńgerýshisi Baǵyjan Erbolatuly jastarmen tıimdi qarym-qatynas ornatýdyń zamanaýı tásilderi týraly baıandama jasady.
Al Astana qalasy «Áziret Sultan» meshitiniń jastar isine jaýapty mamany Shalqar Joldy QMDB bekitken jyldyq jospar aıasynda júzege asyrylatyn jobalardy tanystyrdy. Atap aıtqanda, jastar arasynda dinı Ekstremızmniń aldyn alýǵa arnalǵan semınarlar, «Jastar jáne otbasy» atty semınar-trenıng, «Tazalyq – ımannyń jartysy» Ekologııalyq aktsııasy, salaýatty ómir saltyn nasıhattaıtyn sporttyq jobalar, nashaqorlyqtyń aldyn alý baǵytyndaǵy kezdesýler, sondaı-aq Shákárim Qudaıberdiulynyń «Musylmandyq sharty» jáne Ybyraı Altynsarınniń «Musylmanshylyqtyń tutqasy» eńbekteri negizinde turaqty dárister uıymdastyrý josparlary tanystyryldy.
Jıyn sońynda qala bas ımamy jastarmen jumysty zaman talabyna saı jetildirýdiń mańyzyn atap ótip, jasandy ıntellekt múmkindikterin tıimdi paıdalaný, ulttyq jáne rýhanı qundylyqtardy dáripteý, elge adal qyzmet etetin bilimdi ári parasatty urpaq tárbıeleý jolynda birlese eńbek etýge shaqyrdy.
Источник: Aisha
