Bas meshit shákirtteri arasynda Bilim saıysyna irikteý ótkizildi (FOTO)

Keshe Astana qalasyndaǵy respýblıkalyq «Áziret Sultan» meshitindegi «Dinı saýat ashý kýrsynyń» shákirtteri arasynda Bilm saıysyna irikteý ótkizildi. Islam aqıdasy boıynsha uıymdastyrylǵan saıysqa jalpy sany 120 shákirt qatysyp, test suraqtary boıynsha bilimderin sarapqa saldy.

Aıta keteıik, qazirgi tańda elimizdiń Bas meshitinde 600-ge jýyq shákirt dinı saýat ashyp, dáris alyp keledi. Shákirtterdiń dinı saýatyn ashyp, bilimderin arttyryp qana qoımaı, aradaǵy baýyrmaldyqty arttyryp, jamaǵat yntymaǵyn jarastyra túsý maqsatynda «Áziret Sultan» meshitiniń bas ımamy Naýryzbaı qajy Taǵanulynyń bastamasymen túrli sporttyq saıystar, bilim jarystary turaqty túrde úzbeı jalǵasyp keledi.

Ótken aptanyń jeksenbisinde voleıbol týrnırinde sporttyq sheberlikteri men kúsh-qaıraty synǵa túsken shákirtter keshegi ótken irikteý saıysynda jınaǵan bilimderine júginip, meshit ımamdary arnaıy daıyndaǵan suraqtar boıynsha saraptaldy. Aıta keteıik, meshit shákirtterine Bilim saıysyna ázirlik retinde buǵan deıin «Islam aqıdasy» kitaby taratylyp, test suraqtary osy kitap negizinde daıyndalatyny eskertilgen bolatyn.

Bilim saıysynyń irikteý kezeńi boıynsha joǵary upaı jınaǵan úmitkerler Táýelsizdik merekesine oraı 14-jeltoqsan kúni juma namazynan soń jamaǵat aldynda ótetin aqtyq saıysqa joldama alatyn bolady.

Sýretterdi «FOTOGALEREIa» aıdarynan kóre alasyzdar!