Bas meshitte 800 janǵa alǵashqy aýyzashar berildi (FOTO)

Búgin Astana qalasyndaǵy respýblıkalyq «Áziret Sultan» meshitinde alǵashqy aýyzashar dastarhany jaıyldy. Jyl saıyn Ramazan aıy boıy jamaǵatqa tegin aýyzashar uıymdastyryp kele jatqan respýblıkalyq «Áziret Sultan» meshitindegi berekeli dastarhannyń bıylǵy jyly aýqymy keńeıgen bolatyn. QMDB tóraǵasynyń birinshi orynbasary, naıb múftı, «Áziret Sultan» meshitiniń bas ımamy Naýryzbaı qajy Taǵanulynyń bastamasymen qulshylyq ordasynyń oń jaq qanatyndaǵy kireberis zalǵa da dastarhan jaıylyp, shaqyrylatyn qonaqtar sany 800-ge josparlanǵan edi.

Alla razylyǵy úshin tańnnyń atysy men kúnniń batysy aralyǵynda iship-jemnen, nápsi qalaýlarynan tyıylyp, sabyr men shydamyn shyńdaı túsken jamaǵat aqsham namazynan soń meshit meıramhanasynda bas qosyp, múbárak aıdyń berekeli dastarhanyna jaıǵasty. Aıta keteıik, Mumtaz meıramhanasy da bıylǵy Ramazan aıyna zor daıyndyqpen kirisken bolatyn. Qarapaıym qasyq-shanyshqydan bastap, ústel-oryndyqtaryna da deıin keshe túgeldeı jańartylyp, múbárak aıǵa muntazdaı taza qalpynda aıaq basty.

Berekeli dastarhan basynda jamaǵatqa «Áziret Sultan» meshitiniń naıb ımamy Baqytjan Ótkelbaev ýaǵyz aıtyp, qasıetti Ramazan aıynyń mán-mańyzyn túsindire tústi. Qasıetti Quran aıattary oqylyp, jamaǵatpen birge duǵa jasaldy.