BAS MÚFTI 2026 JYLDY «ISLAM JÁNE ADAL QOǴAM» JYLY DEP JARIIaLADY
Búgin elordada Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly din qyzmetkerlerine dástúrli Baǵdarlyq baıandamasyn joldap, 2026 jyldy dinı sala aıasynda «Islam jáne adal qoǵam» jyly dep jarııalady.
«Islam adamdy tek Alla aldynda ǵana emes, qoǵam aldynda da jaýapty bolýǵa tárbıeleıdi. Árbir is-áreket úshin esep beriletinine sený – adaldyqtyń eń bıik kórinisi. Aqyret kúnine ıman keltirý adamdy ádiletsizdikten, qııanattan, jamandyqtan saqtaıdy. Óıtkeni musylman adam eshbir isiniń eskerýsiz qalmaıtynyn jaqsy biledi. Al qazirgi zamanda búkil adamzat aldynda turǵan ózekti máselelerdiń biri – ádiletsizdikpen kúresip, adal qoǵam qurý.
Osy baǵyttaǵy jumystardy júıeli túrde júzege asyrý úshin 2026 jyldy dinı qyzmet aıasynda «Islam jáne adal qoǵam» jyly dep jarııalaý týraly sheshim qabyldadym. Bul – árbir azamattyń qoǵam aldyndaǵy jaýapkershiligin arttyrýǵa baǵyttalǵan mańyzdy qadam dep sanaımyn», - dedi Bas múftı.
Aıta keteıik, jıynǵa Dinı basqarma qyzmetkerleri, oblystardyń bas ımamdary, QMDB Aqsaqaldar, Ǵulamalar, Sarapshylar keńesi men RANT músheleri, zııaly qaýym ókilderi, dinı oqý oryndarynyń basshylary men ustazdary offlaın jáne onlaın formatta qatysyp otyr.
