Bas múftı 9 jasar Dıananyń ótinishine jaýap berdi (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly elorda irgesindegi Qaraótkel eldimekeninde turatyn kópbalaly otbasynyń úıinde arnaıy qonaq boldy.
Qasıetti Ramazan aıynyń jıyrmasynshy aýyzasharyn 6 qyz, 2 ul ósirip otyrǵan Dosbolat Amangeldiniń shańyraǵynda ótkizgen Bas múftı balalarǵa syı jasap, synaqqa tap bolǵan otbasyǵa kómek berdi.
«Alla Taǵala synaqty ár pendege kótere alatyn deńgeıde ǵana beredi jáne árbir qıyndyqtyń sońynan jeńildigin, aýrýǵa shıpasyn násip etedi. Kishkentaı Dıananyń kózi qalpyna kelip, qataryna tez qosylaryna senemiz, bir Alladan syrqatyna shıpa tileımiz. Sabyr etip, Jabbar Iemizden úmit úzbeýge shaqyramyn. Sátin salyp, syrqatynan aıyǵyp ketýine tilektespin. Búgingi aýyzasharlaryńyz, duǵa-tilekterińiz qabyl bolsyn! Úılerińizge tek ıgi jaqsylar qonaq bolyp, dastarqandaryńyzdan dám úzilmesin», – dep Bas múftı Naýryzbaı qajy Taǵanuly aqjarma tilegin jetkizdi.
Aıta keteıik, jýyrda ǵana áleýmettik jelilerde bir kózin zaqymdap alǵan 9 jasar Dıananyń beıneúndeýi tarady. Úıinde baýyrlarymen oınap júrip, esiktiń tutqasyna kózin soǵyp, qatty zaqymdap alǵan Dıanaǵa Túrkııa memleketinde ota jasaýdyń sáti túsip tur. Osyǵan oraı Bas múftı Naýryzbaı qajy Taǵanuly QMDB «Zeket jáne qaıyrymdylyq» qorynyń uıytqy bolýymen Dıana Dosbolatqyzynyń emine 1 mıllıon teńge kómek berdi.
Alla Taǵala kishkentaı Dıananyń dertine shıpa berip, tezirek qatarǵa qosylýdy násip etsin!
