BAS MÚFTI: ÁBSATTAR HAZIRET DIN QYZMETKERLERINIŃ BILIMIN ARTTYRÝǴA MOL EŃBEK SIŃIRDI (FOTO)
Almaty qalasyndaǵy ál-Farabı atyndaǵy Qazaq ulttyq ýnıversıtetinde kórnekti ǵalym, akademık, dıplomat Ábsattar qajy Derbisáliniń 75 jyldyǵy men memlekettik, qoǵamdyq jáne dinı qyzmetiniń 50 jyldyǵyna arnalǵan «Shyǵystaný jáne rýhanııat máseleleri» taqyrybynda ótip jatqan halyqaralyq ǵylymı-teorııalyq konferentsııada Bas múftı Naýryzbaı qajy Taǵanuly osylaı dedi.
«Ol sanaly ǵumyryn ǵylym-bilimge arnady. Ábsattar qajy Baǵysbaıuly otandyq din mamandaryn daıarlaýǵa basa kóńil bólip, 2001 jyly Nur-Múbarak Egıpet ıslam mádenıeti ýnıversıtetin ashty. Qazirgi tańda atalmysh ýnıversıtet dinı joǵary bilimdi maman daıarlaıtyn birden-bir oqý orynǵa aınaldy. Meshitterde qyzmet etip júrgen din qyzmetkerleriniń bilimi men biliktiligin arttyrý maqsatynda 2002 jyly «Respýblıkalyq ımamdardyń bilimin jetildirý ıslam ınstıtýtyn» ashyp, ımam, moldalardyń bilimin jetildirý isin qolǵa aldy.
Sonymen qatar respýblıkamyzdyń 9 aımaǵynan 9 medrese, 1 qarılar daıarlaıtyn ortalyq ashyp, arnaýly dinı bilimdi mamandardy shyǵarýǵa kúsh saldy» dep atap ótti Naýryzbaı qajy Taǵanuly.
