BAS MÚFTI «ÁL-FARABI» MEShITINDE JUMA ÝAǴYZYN AITTY (FOTO)
Búgin QMDB Tóraǵasy, Bas múftı Naýryzbaı qajy Taǵanuly elordadaǵy «Ábý Nasyr ál-Farabı» meshitinde jamaǵatqa juma ýaǵyzyn aıtty.
«Qasıetti Quranǵa qurmet kórsetý» taqyrybynda ýaǵyz aıtqan Bas múftı: «Alla Taǵala Quran Kárimniń «Shýra» súresinde: (Muhammed) saǵan osylaısha ámirimizden bir «Rýh» (Qurandy) ýahı ettik» deıdi. Sebebi rýhtyń denege ómir syılaıtyndyǵy sııaqty, Quran kitaby da adamnyń júregine ómir syılap, ony eki dúnıe baqytyna jeteleıdi. Quranda adam balasynyń aqyly men rýhyna, tipti barlyq sezimderine qajet nárseler túgel qamtylǵan. Jeke tulǵa, qoǵamdyq, rýhanı hám aqyrettik ǵumyrǵa tıisti qajettiliktiktiń tutasy bolǵandyqtan ol – dertke shıpa, janǵa daýa kitap. Quran negizderi pendeniń «tolyq adam» shyńyna qaraı qanat bitirip, hám nápsiniń tizginin tartyp, rýhtyń asqaq sezimderin qanaǵattandyrýda erekshe dara. Quran adam jaratylysyna sáıkes bolǵandyqtan túsinetin dárejede sóz qozǵap, oı-sanamyzǵa qajetti barlyq zárý ilimderdi úıretedi.
Endeshe, ár adam Alla Taǵalanyń kálámin qasterlep, qasıetti Quranǵa úlken qurmet kórsetýi qajet» dedi.
QMDB Tóraǵasy juma namazynan keıin meshit jamaǵatymen birge el amandyǵy men tynyshtyǵy úshin duǵa jasady.
