Bas múftı Almaty ımamdarymen kezdesti (FOTO)
QMDB Tóraǵasy, Bas múftı Naýryzbaı qajy Taǵanuly Almaty qalasyna jasaǵan jumys sapary aıasynda shaharǵa qarasty aýdan ımamdarymen arnaıy kezdesý ótkizdi.
Kezdesý Almatydaǵy tártipsizdik kezinde sheıit bolǵan sarbazdarymyz ben beıbit turǵyndardyń rýhyna Quran baǵyshtaýmen bastaldy. Kezdesýge qalanyń bas ımamy Tólebı Ospan jáne 8 aýdannyń ımamdary tolyq qatysty. Júzdesý barysynda Bas múftı qaladaǵy tártipsizdik kezinde shahardyń tynyshtyǵy men turaqtylyǵyna atsalysqan ımamdarǵa alǵys bildirdi.
«Bıylǵy 2022 jyldy QMDB «Islam – yntymaq jáne birlik dini» dep jarııalady. Jyl bastalǵaly beri elimizde birshama tártipsizdik jaǵdaıy oryn alyp, el turǵyndarynyń yntymaǵy men birligine syzat tústi. Osy oraıda Qazaqstan musylmandary dinı basqarmasy halqymyzdy birlikke, tynyshtyqqa shaqyrýǵa úndeıtin nasıhat jumystaryn kúsheıtýdi qolǵa aldy», – dedi Bas múftı.
Sondaı-aq jıyn barysynda Naýryzbaı qajy Taǵanuly eldi bereke men birlikke shaqyryp, meshitterdiń qaýipsizdigin kúsheıtýdi tapsyrdy.
