BAS MÚFTI ALMATYDA JUMA ÝAǴYZYN AITTY (FOTO)
Búgin Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Almaty Ortalyq meshitinde jamaǵatqa juma ýaǵyzyn aıtty.
Alla Taǵalaǵa ıman keltirgen pende árqashan keleshekke úmitpen qaraıtynyn tilge tıek etken QMDB Tóraǵasy adam da, qoǵam da úmittiń arqasynda alǵa basyp, damıtynyn aıryqsha atap ótti.
«Pende óziniń úmiti arqyly túrli belesterden qınalmaı ótip, bıik shyńdarǵa shyǵyp, kóptegen jetistikterge qol jetkizedi. Osyny eskergen halqymyz maqal-mátelderinde: «Úmitsiz jannan bez, qaıyrsyz maldan bez», «Shyqpaǵan janda úmit bar», «Úmitsiz shaıtan», – degen túrli nasıhattar qaldyrǵan. Alla Taǵala qasıetti Qurandaǵy «Hıjr» súresiniń 56-aıatynda bizderdi esh ýaqytta úmit úzbeýge shaqyryp: «Rabbyńnyń raqymdylyǵynan adasýshylardan basqa kim úmit úzedi?» – dep aıtqan.
Úmitsizdik – únsiz jutatyn uıyq ispetti. Adam qansha qarmanbaq bolsa da, esh nársege qol iliktire almaı, batqan saıyn bata túsedi. Úmitsizdik qylý adamdy kúızeliske uryndyryp, keleshegin tumshalaıdy. Bul dúnıede ómir súrýge degen ynta-yjdahatyn, erik-jigerin, qulshynysyn quryqtap tastaıdy. Batyr babamyz Baýyrjan Momyshuly: «Úmit órge tartady, úmitsizdik kórge tartady», – deýi osydan» dedi Naýryzbaı qajy Taǵanuly.
Bas múftı juma namazynan keıin Almaty Ortalyq meshitiniń jamaǵatymen birge el amandyǵy men tynyshtyǵy úshin duǵa jasady.
