Bas múftı Aqparat salasy boıynsha jumys esebin tyńdady (FOTO)
Búgin Bas múftı Naýryzbaı qajy Taǵanuly Aqparat jáne qoǵammen baılanys bóliminiń Ramazan aıynyń alǵashqy aptasynda jasaǵan jumys esebin tyńdady.
Jıynda Aqparat jáne qoǵammen baılanys bóliminiń meńgerýshisi Aǵabek Qonarbaıuly Bas múftıge aqparat salasy boıynsha Ramazan aıynda atqarylyp jatqan mańyzdy jumystar jaıly esep berdi.
Bólim basshysy Rabbymyzdyń meıirim-mahabbatyna bólenetin aıdaǵy Dinı basqarmanyń negizgi jumys baǵyttary boıynsha atqarylyp jatqan jumystardyń BAQ betterinde, medıa quraldardaǵy nasıhaty jaıly baıandady. Sondaı-aq elimizdiń arnalaryndaǵy, áleýmettik jelilerdegi orazaǵa qatysty jasalyp jatqan jumystarǵa toqtaldy. QMDB bólim basshylary men mamandary podkast túrindegi «Ramazan – nur shashqan aı» jańa baǵdarlamasyna, sondaı-aq «Túrkistan» telearnasynyń «Jańa tolqyn» baǵdarlamasyna qatysyp, oraza jaıly saýaldarǵa jaýap berip jatqanyn atap ótti.
Bólim saǵatynda QMDB Ǵalamtormen jumys sektorynyń meńgerýshisi Serikbol Hasan Dinı basqarmaǵa qarasty saıttar men áleýmettik jelilerdegi orazaǵa qatysty jumystardyń esebin berdi. Oraza aıynda belsendi jumys istep jatqan saıttardy atap ótip, áleýmettik jelilerde suraq-jaýap formatyndaǵy onlaın tikeleı Efırler, basqa da mańyzdy is-sharalar ótip jatqanyn alǵa tartty. Sondaı-aq Dinı aqparat berý ortalyǵy mamandarynyń táýlik boıy qazaq jáne orys tilinde orazaǵa qatysty suraqtarǵa jaýap berip jatqanyn atap ótti.
«Munara TV» telearnasynyń dırektory Nurjan Darqulov Ramazan aıynda Efırden kórermenderge jol tartqan jańa baǵdarlamalar jaıly baıandady. Sondaı-aq Qadir túni qarsańynda «Munara TV» arnasy tikeleı Efırde arnaıy baǵdarlama usynatynyn atap ótti.
Jıyn sońynda QMDB Tóraǵasy Naýryzbaı qajy Taǵanuly Dinı basqarma jumysyn nasıhattaý baǵytynda birqatar tapsyrmalar berdi. Sondaı-aq Ortalyq Apparat qyzmetkerleri bólimniń jumysyna qatysty usynys-pikirlerin jetkizdi.
