Bas múftı Aqsaqaldar forýmynda baıandama jasady (FOTO)
Aqtaý qalasynda ótip jatqan «QARIIaLYQ – DANALYQ PEN ÓMIR TÁJIRIBESINIŃ QAINAR KÓZI» atty Qazaqstannyń batys óńiri aqsaqaldary forýmynda QMDB Tóraǵasy Naýryzbaı qajy Taǵanuly baıandama jasady.
Bas múftı kóptegen máselelerdiń ońtaıly sheshimin tabýyna sebepker bolyp kele jatqan qazynaly qarııalardyń qoǵamdaǵy róline toqtalyp, búgingi dýaly aýyz aqsaqaldarymyzdy aýyl arasyndaǵy daý-damaıdy meılinshe mámile aıasynda sheshýge, jergilikti ákimdik deńgeıinde qolǵa alynǵan bastamalardy aq batamen bastaýǵa, qoǵamdaǵy neke men otbasy, jaqyn týys, aǵaıyn arasy t.b. máselelerdi sheshýge, ultaralyq qaqtyǵystar men rýaralyq alaýyzdyqtardy meılinshe boldyrmaýǵa, destrýktıvti dinı aǵymnyń jeteginde ketken jastardy jónge salýǵa barynsha yqpal etýge shaqyrdy.
«Jastarǵa tálim-tárbıe berýde júris-turysynan danalyqtyń kórkem úlgisi esip turatyn dýaly aýyz aqsaqaldarymyzdyń orny erekshe. Ómir mektebiniń san túrli satysynan ótken, kópti kórgen, kórgenin kókeıge túıgen aqsaqaldardyń keńesi aýadaı qajet. Sebebi biz bolmysymyzdan bir sózben erdiń qunyn keshirgen, qaı zamanda da júıeli sózge toqtaǵan halyqpyz. Sol sebepti sizderdi el múddesi úshin birigip qyzmet etýge shaqyramyn» dedi Naýryzbaı qajy Taǵanuly.
Sondaı-aq Aqsaqaldar forýmynda sondaı-aq Mańǵystaý oblysynyń ákimi Nurlan Noǵaev, «Ardagerler uıymy» respýblıkalyq qoǵamdyq birlestigi tóraǵasynyń orynbasary Ómirzaq Ozǵanbaıuly, memleket jáne qoǵam qaıratkeri Amangeldi Aıtaly jáne QMDB Aqsaqaldar keńesiniń músheleri men Qazaqstannyń batys óńiri aqsaqaldary qatysyp, baıandama jasaýda.
