Bas múftı Aqtóbe oblysynyń ákimimen kezdesti (FOTO)

Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Aqtóbe oblysyna jasaǵan resmı saparynda óńir basshysy Ońdasyn Orazalınmen kezdesti.

Kezdesýde aımaqtaǵy dinı ahýal talqylandy. Atap aıtqanda, ımamdardy áleýmettik turǵydan qoldaý, destrýktıvti dinı aǵymda júrgen azamattardy qoǵamǵa beıimdeý, jastarǵa durys dinı aqparat berý, halyqqa din men dástúr sabaqtastyǵyn nasıhattaý, meshitterdi biryńǵaı úlgimen qazaqy naqyshta salý syndy máseleler sóz boldy.

«Imamdarymyz qashan da el ıgiligi úshin qyzmet ete beredi. Keshegi qańtar oqıǵasy kezinde de din qyzmetkerleri el aldyna shyǵyp, halyqty sabyrǵa shaqyryp, qaıratkerlik tanytty. Qazir jas mamandy aýylǵa qyzmetke ornalastyrý úshin onyń áleýmettik máselesine kóńil aýdarý kerek. Bizdiń ımamdarymyzdyń da alańsyz jumys isteýi úshin olarǵa jan-jaqty qoldaý qajet», – dedi Naýryzbaı qajy Taǵanuly.

Oblys ákimi Ońdasyn Orazalın Bas múftı kótergen máselelerge ákimdik tarapynan kóńil bólinetinin jetkizdi.

Aıta ketsek, búginde Aqtóbe oblysy boıynsha 68 meshit bar. Qazirgi tańda 5 jańa meshittiń qurylysy júrip jatyr. Meshitterde 111 dinı qyzmetker jumys isteıdi. Al «Aqtóbe» medrese-kolledjinde 141 stýdent bilim alýda.