Bas múftı atynan qazaqstandyq qajylarǵa dastarqan jaıyldy (FOTO)
Búgin Mekke qalasynda QMDB Tóraǵasy, Bas múftı Naýryzbaı qajy Taǵanulynyń atynan qazaqstandyq qajylardyń qurmetine arnaıy dastarqan jaıyldy.
Is-sharaǵa Qajylyq mıssııasynyń tóraǵasy Ershat qajy Ońǵar, Qazaqstannyń Jıdda qalasyndaǵy Bas konsýly Talǵat Shaldanbaı, mıssııa músheleri, 14 qajylyq kompanııasynyń jetekshileri, ýaǵyz-nasıhatqa jaýapty ımamdar men qajylar qatysty.
Is-shara qasıetti Quran aıattaryn oqýmen bastaldy. Odan ary mıssııa tóraǵasy Ershat Ońǵar meımandarǵa Bas múftı Naýryzbaı qajy Taǵanulynyń duǵaı sálemin jetkizip, qajylarǵa qut-bereke tiledi. Sondaı-aq jıynda Bas konsýl Talǵat Raqymqululy sóz sóılep, qajylarǵa izgi tilegin jetkizse, QMDB Ýaǵyz-nasıhat bóliminiń meńgerýshisi Batyrjan Mansurov əserli ýaǵyz aıtyp, qajylardyń júregin tebirentti. Basqosý sońynda meımandarǵa QMDB atynan syılyqtar taratyldy.
