Bas múftı aýdan ákimimen dinı ahýaldy talqylady (FOTO)
Qazaqstan musylmandary dinı basqarmasynyń tóraǵasy Naýryzbaı qajy Taǵanuly Qaraǵandy oblysyna jasaǵan jumys saparynda Qarqaraly aýdanynyń ákimi Erlan Beısembaıulymen kezdesti.
Kezdesýde aýdandaǵy dinı ahýal talqylandy. Sonymen qatar, basqosýda jastardy jaqsy isterge jumyldyrý, jas býyn ókilderi arasynda dinı aǵartý, túsindirme jumystaryn júrgizý syndy máseleler sóz boldy.
«Qarqaraly aýdanynda ótip jatqan Ǵulamalar keńesiniń kezekti májilisinde elimizdegi musylman qaýymyn alańdatqan ózekti máseleler talqylanýda. Igi is-sharamyzǵa qoldaý kórsetkenińiz úshin aıryqsha alǵysymdy jetkizemin», – dedi Naýryzbaı qajy Taǵanuly.
Aıta ketsek, keńestiń kezekti májilisinde birqatar ózekti máseleler, atap aıtqanda, monopolııa úkimi, musylman emes kisige turmysqa shyǵýdyń úkimi, bırjada aktsııany satyp alý jáne satý úkimi, qundy qaǵazdan zeket berý úkimi, AHAT arqyly neke qııýdyń sharıǵı úkimi syndy taqyryptarda ázirlengen pátýalardyń mazmuny talqylanýda.
