BAS MÚFTI AÝYL MEShITINDE JUMA ÝAǴYZYN AITTY (FOTO)
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Almaty oblysy Talǵar aýdanyna qarasty Qyzyltý aýylynyń meshitinde jamaǵatqa juma ýaǵyzyn aıtty.
Bas múftı «Ibrahım Halılýlla» meshitinde «Ózgeni ózińnen joǵary qoıý – izgiler sıpaty» taqyrybynda juma ýaǵyzyn ótkizip, jamaǵatty ózara baýyrmal, janashyr bolýǵa shaqyrdy.
«Asyl dinimiz Islam musylmandardy tek ózin ǵana emes, ózgelerdiń de qal-jaǵdaıyn oılap, ýaıymdap, qaraılasýdy, ózgeni ózinen de joǵary qoıý qatejittigin úıretedi. Ardaqty Paıǵambarymyzdyń (oǵan Allanyń salaýaty men sálemi bolsyn) ónegeli tálimin kórgen sahabalary bir-birine baýyrmal, janashyr ári árqaısysy óziniń jeke basynyń qajettiliginen, ózgeniń qajettiligin joǵary qoıatyn edi. Alla Taǵala qasıetti Qurannyń «Hashyr» súresi, 9-aıatynda Mekkeden kóship kelgen muhajırlerge járdemdesken mádınalyq ansarlar týraly: «Sondaı-aq ózderinde tarshylyq bola tura olardy ózderinen artyq kóredi. Álde bireý sarańdyqtan saqtansa, mine solar qutylýshylar», – dep aıtqan.
Aısha anamyz (Alla oǵan razy bolsyn): «Alla Elshisi (oǵan Allanyń salaýaty men sálemi bolsyn) dúnıede ómiriniń sońyna deıin úsh kún qatarynan toıyp tamaq jegen emes. Qalasaq toıyp jeıtin múmkindigimiz bar edi. Biraq ózgelerdiń qajetin ózimizden artyq qoıatyn edik», – degen.
Halqymyzda: «Ózin ǵana oılaǵan jamandyqtyń belgisi, ózgeni de oılaǵan adamdyqtyń belgisi», «Atadan jaqsy ul týsa, eliniń qamyn jeıdi, atadan jaman ul týsa, eliniń malyn jeıdi», – degen naqyl sózder adam balasyna óziniń jeke basynyń qamyn emes, ózgeniń de qamyn jep, ýaıymdaýdy úndeıdi» dedi Naýryzbaı qajy Taǵanuly.
Bas múftı juma namazynan keıin aýyl meshitiniń jamaǵatymen birge el amandyǵy men tynyshtyǵy úshin duǵa jasady.
