Bas múftı azanshylar jarysynyń jeńimpazdaryn marapattady (FOTO+VIDEO)

Búgin Almaty Ortalyq meshitinde uıymdastyrylǵan «Ádemi áýezdi Azanshy» V respýblıkalyq azanshylar jarysy qorytyndylandy.

Fınaldyq kezeńnen keıin júzden júırik shyqqan jeńimpazdar men júldegerlerdi QMDB Tóraǵasy, Bas múftı Naýryzbaı qajy Taǵanuly arnaıy marapattap, barlyq qatysýshyǵa alǵysyn bildirdi.

«Dana halqymyz «Azany bar el azbaıdy, birligi bar el tozbaıdy» deıdi. Azan aıtylǵanda musylmandardyń meshitke qaraı bet alyp, ıyq tiresip namaz oqýy, odan keıin eldiń amandyǵyn, zamannyń tynyshtyǵyn, qoǵamnyń berekesin bir Alladan tileýi birlikke bastaıtyn jol, eldikke úndeıtin izgi amal desek, artyq aıtqanymyz emes.

Ádemi áýezdi azanshylarymyzdyń respýblıkalyq saıysy alǵash ret 2009 jyly elordada ótse, odan keıin Almaty men Aqtóbede, 2020 jyly Mańǵystaý jerinde ótken bolatyn. Respýblıkalyq Qurandy jatqa oqýdan ótetin baıqaýlar qarılarymyzdy elge tanytyp jatsa, azanshylar jarysy da ádemi áýezdi din qyzmetkerleriniń kópshilikke tanylýyna jol ashyp keledi. Qarapaıym ǵana aýdandyq, aýyldyq meshitterde qyzmet istep júrgen ımamdardyń úlken qalalardyń ortalyq meshitterinde azan aıtýyna múmkindik beredi», – dedi Bas múftı.

Elimizdiń ár aımaǵynan qatysqan 20 azanshynyń ishinen Qýanysh Bákenuly (Túrkistan oblysy) top jaryp, besinshi ret ótken respýblıkalyq jarystyń jeńimpazy atandy. II oryn kópshilikke tanymal din qyzmetkeri, almatylyq azanshy Qasym Áshimovke buıyrsa, Atyraýdan kelgen Salamat Imanǵalıev júldeli III orynnan kórindi. Al Ábdimútálip Joraqululy (Mańǵystaý oblysy) men elordadan kelgen Erbolat Shaýdyrbaı yntalandyrý syılyǵyna ıe boldy. Sondaı-aq jarysqa qatysýshylardyń arasynda eń egde jastaǵy azanshy, Almaty qalasyndaǵy «Feralı Ferǵanuly» meshitiniń ustazy Abdýlǵaffar Sırojıddın «Kórermen kózaıymy» nomınatsııasyna ıe boldy.

Jeńimpazdar men júldegerlerge qarjylaı syılyq tabystalsa, barlyq qatysýshy Bas múftıdiń alǵys hatymen jáne aqshalaı syıaqymen marapattaldy.