Bas múftı baǵdarlyq baıandamasyn joldady (FOTO)
Elordada Qazaqstan musylmandary dinı basqarmasynyń 2022 jylǵa arnalǵan keńeıtilgen Tóralqa májilisinde Bas múftı Naýryzbaı qajy Taǵanuly baǵdarlyq baıandama jasady.
«Biz 2022 jyldy «Islam – yntymaq pen birlik dini» jyly dep jarııaladyq. Bul elimizdiń turaqtylyǵy men tynyshtyǵyn nyǵaıtýǵa oń yqpal etedi degen senimdemin. Qoǵam aldyndaǵy bizdiń basty mindetimiz – musylman qaýymynyń birligin nyǵaıtý, búlik pen jalǵan dinı urandarǵa jol bermeý. Biz muny tereń oılanyp, jamaǵattyń kókeıine salýymyz tıis.
Búginde Dinı basqarma bıyl aǵartý salasyn jańǵyrtýǵa kóńil bólip keledi. Osy oraıda elordamyzdan arnaıy tereń dinı bilim beretin «Islam ortalyǵyn» ashýdy josparlap otyrmyz. Maqsat – otandyq dinı kadrlardyń sapasyn arttyrý.
Biz – Islam mádenıeti men órkenıetine úlken úles qosqan halyqpyz. Osyǵan oraı «Matýrıdı aqıdasy jáne Qazaqstandaǵy Islam», «Altyn Ordanyń Qazaq jerindegi Islamnyń damýyna qosqan úlesi» taqyrybynda respýblıkalyq ǵylymı-tájirıbelik konferentsııa ótkizemiz», – dedi Bas múftı.
Sondaı-aq, QMDB Tóraǵasy Naýryzbaı qajy Taǵanuly 2022 jyly da jeti baǵyt, atap aıtqanda, dinı bilim jáne ǵylym, ýaǵyz-nasıhat jáne ıhsan, din men dástúr, aqparat jáne aǵartý, qoǵammen baılanys, ýaqyp jáne qaıyrymdylyq baǵyty, sondaı-aq dinı ońaltý baǵytyndaǵy jumystarǵa basymdyq beriletinin málimdedi.
