Bas múftı Bas meshitte bir top delegatsııany qabyldady (FOTO)

Búgin QMDB tóraǵasy Serikbaı qajy Oraz respýblıkalyq «Áziret Sultan» meshitinde Álemdik jáne dástúrli din lıderleriniń VI sezi aıasynda Birikken Arab Ámirlikteriniń Islam jáne qaıyrymdylyq isteri jónindegi departamentiniń birtop delegatsııasyn qabyldady.

Atalǵan departamenttiń Qaıyrymdylyq ister boıynsha atqarýshy dırektory Ahmad ál-Mýheırı bastaǵan delegatsııa ókilderi Bas múftı Serikbaı qajy Orazben Qazaqstandaǵy Islamnyń damýy týraly suhbattasty.

Ahmad ál-Mýheırı departamenttiń qaıyrymdylyq baǵytyndaǵy jumystarymen tanystyryp, ıgi jobalar jaıly baıandap berdi. Taraptar sadaqa berýdiń jańa tehnologııalyq tásili jaıly pikir alysty.

Óz kezeginde Serikbaı qajy Satybaldyuly elimizdegi oblystyq meshitterde sadaqa termınaldarynyń ornatylǵanyn atap ótti.

«Bul – múftııattyń qarjylyq ashyqtyǵyn qamtamasyz etýmen qatar, jamaǵattyń sadaqa berý mádenıetine oń áser etedi dep esepteımin. Bul baǵyttaǵy jobalarymyzdy qalalyq, aýdandyq meshitterde júzege asyratyn bolamyz», – dedi Bas múftı S.Oraz.

Kezdesý sońynda taraptar qaıyrymdylyq, sadaqa berý termınaldaryn ornatý, t.b. sala boıynsha tájirıbe almasýǵa ýaǵdalasty.

​