BAS MÚFTI BATA BERÝ BAIQAÝYNYŃ JEŃIMPAZDARYN MARAPATTADY (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Astanadaǵy Bas meshitte aqsaqaldar arasynda ótken I respýblıkalyq bata berý baıqaýynyń marapattaý rásimine qatysty.
Oblystyq irikteý kezeńinen oza shaýyp kelgen dýaly aýyz 20 aqsaqal záýlim meshit ishin batamen jańǵyrtty. Bas múftı Naýryzbaı qajy Taǵanuly joldyń alystyǵyna, ózderiniń qarttyǵyna qaramaı elorda tórinen tabylyp, qazaqtyń bata berý saltyn qaıta jańǵyrtqan aqsaqaldarǵa aıryqsha alǵysyn bildirdi. Sondaı-aq osy baıqaýdy respýblıkalyq deńgeıde alǵash ret uıymdastyryp otyrǵan Dinı basqarma ujymyna jáne taǵylymdy saıysqa demeýshilik jasaǵan jomart azamattarǵa rızashylyǵyn jetkizdi.
Qazylar alqasynyń sheshimimen sharıǵat pen dástúrge saı maǵynaly bata berý, daýys yrǵaǵy, kıim úlgisi, qosymsha suraqtarǵa jaýap berý talaptary boıynsha úzdik dep tanylǵan aqsaqal Baltabaı Syzdyqov (Pavlodar oblysy) 1-oryndy jeńip aldy. 2-oryn Serikbek Balqybekulyna (Jetisý oblysy) jáne 3-oryn Shahan Tursynhanov (Abaı oblysy) aqsaqalǵa buıyrdy. Sonymen qatar Jumabaı Tájibaev (Almaty qalasy), Samıǵolla Mashaev (Atyraý oblysy) pen Dáriqul Mahambetovke (Qyzylorda oblysy) yntalandyrý syılyǵy jáne barlyq qatysýshy aqsaqaldarǵa qarjylaı syılyq berildi.
Aqsaqaldardyń bata berý ónerin ǵalym, memleket jáne qoǵam qaıratkeri Ómirzaq Ozǵanbaev, jazýshy-jýrnalıst, qoǵam qaıratkeri Jabal Erǵalıev, fılologııa ǵylymynyń doktory, professor Serik Negımov, QMDB Tóraǵasynyń orynbasary, naıb múftı Sansyzbaı Qurbanuly men elordalaǵy «Sheıh Kýnta qajy» meshitiniń bas ımamy Ómirzaq Bekqoja baǵalap, tórelik jasady.
Aıta keteıik, batagóı aqsaqaldar arasynda alǵash ret uıymdastyrylǵan respýblıkalyq baıqaý «Munara TV» telearnasy men «Mýftııat QMDB» YouTube arnasynda, sondaı-aq Dinı basqarmanyń Instagram jelisindegi resmı paraqshasynan tikeleı Efırde kórsetildi.
