BAS MÚFTI «BEKET ATA JÁNE IHSAN ILIMI» KONFERENTsIIaSYNDA BAIaNDAMA JASADY (FOTO)
Búgin Mańǵystaý oblysy Aqtaý qalasynda ótip jatqan «BEKET ATA JÁNE IHSAN ILIMI» respýblıkalyq ǵylymı-tanymdyq konferentsııada Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly arnaıy baıandama jasady.
QMDB Tóraǵasy eń aldymen ıhsan ilimi jaıynda aıta kele, áıgili Beket atanyń ómir joly, onyń qaıratkerlik tulǵasyna toqtaldy.
«Mańǵystaý Mashaıyqtyń basqan jeri
Qasıet-keremeti tasqan jeri.
Jer júzin jelmaıamen jeti aınalyp,
Aýǵanǵa Asan bıdiń asqan jeri... demekshi búgingi Qazaqstan musylmandary dinı basqarmasy Oǵlandyny máńgilik meken Pir Beket atamyzdyń qurmetine uıymdastyryp otyrǵan Beket ata jáne ıhsan ilimi atty konferentsııaǵa qosh keldińizder.
Beket Myrzaǵululy jasynan bilimge qushtar bop ósedi. Ol Hıýaǵa baryp, Sherǵazyhan mederesesinde Baqyrjan (Fahraddın) Muhammadulynan 7 jyl dáris alyp, 21 jasynda elge oralady. Elge oralǵannan keıin ıslam dinin ýaǵyzdap, ustazdyq jumyspen aınalysady. Ómiriniń sońyna deıin shákirt oqytyp, ustazdyq etken Beket ata bala oqytyp qana qoımaı, birneshe meshit salǵan. El aýzyndaǵy áńgimelerde salynǵan meshit sany – jeteý, naqty belgilisi – beseý. Olardyń tórteýi – taý-tóbelerdi úńgip, qashap jasalǵan erekshe meshitter.
Beket ata ǵumyr boıy ıslamnyń júregi sanalatyn ıhsan jolyn ustanyp ótti. Halyq onyń bilimdiligin, erekshe qasıetin, sabyrly bolmysyn, kóptiń tilin taýyp kóńilden shyǵýyn aıryqsha baǵalady. Qazaqstan musylmandary dinı basqarmasy da ıhsan ilimin nasıhattap, «Sopylyq syry» degen atpen kólemdi kitap shyǵardy. Munyń bári saıyp kelgende keshegi babalar ustanǵan joldy jalǵastyrý.
Beket ata óziniń isimen de, sózimen de úlgi bola bildi. Ol árdaıym:
«Tek qana bir Allaǵa syıynyńdar»,
«Alladan medet tileńder!»
«Ata-analaryńdy syılańdar!»
«Bireýge qııanat, ne ozbyrlyq jasap turyp meniń atymdy atamańdar!» dep ósıet qaldyrǵan» dep atap ótti Bas múftı.
Konferentsııada Mańǵystaý oblysynyń ákimi Nurlan Noǵaev Beket atanyń ómiri tereń tuńǵıyq, ony áli de zertteı túsý qajettigin jáne búgingi konferentsııanyń mańyzy zor, tárbıelik, taǵylymdyq máni bólek ekenin jetkizdi. Odan bólek jıynda Ómirzaq Ozǵanbaıuly, Tóráli Qydyr, Áshirbek Mýmınov, Islam Myrzabekuly, Dýman Saıfolla arnaıy baıandama jasap, Beket ata ómirinen tyń derekter jetkizdi. Sondaı-aq qatysýshy ǵalymdar biraýyzdan Beket ata ómirin ǵylymı-tanymdyq maqsatta zerttep, esimin ulyqtaý maqsatynda birqatar mańyzdy is-sharalar atqarý josparyn bekitti.
