Bas múftı «Beıbarys sultan» meshitiniń qurylys jumysymen tanysty (FOTO)
Bas múftı Naýryzbaı qajy Taǵanuly Kaırdegi az-Zahır Beıbarys meshitin aralap, medreseniń tarıhı ornymen tanysty.
Qazirgi tańda meshitke restavratsııa jumystary jasalýda. Keshen keler jyly tolyqtaı jańarmaq. Búginde medreseniń shaǵyn bir bóligi ǵana saqtalypty.
Qazaqstannyń Mysyr Arab Respýblıkasyndaǵy Tótenshe jáne ókiletti elshisi Qaırat Lama Sharıf medreseniń tarıhı 400 sharshy metr orny tolyq saqtalǵanyn atap ótti. Bul medresede belgili ǵulama, hadıs iliminiń bilgiri Ibn Hajar ál-Asqalanı ımamdyq qyzmet istegen. Búginde medreseniń bas ımamy qyzmeti Hısham ál-Kamıl atqarady. Ol medresege kelgen adamdarǵa mıras taqyryby boıynsha dáris berip keledi.
Bas múftı meshit qurylysynyń jumysymen tanysqannan keıin, artyna óshpes ónege qaldyrǵan babalar rýhyna duǵa baǵyshtady.
Tarıhı derekterge júginsek, Beıbarys sultan Mámlúk memleketiniń bıliginen kelgen soń, atap aıtqanda 1266 jyly Kaır shaharynyń ortalyǵynan mámlúk sáýlet óneri úlgisinde az-Zahır Beıbarys meshitin salýǵa ámir bergen. Beıbarys sultan Mysyr men Sham eli tórt qubylasy túgel birtutas memleket bolsyn degen úmitpen, meshittiń pishinin tórt buryshty etip bekitken. Meshittiń qabyrǵasynyń uzyndyǵy – 108 metr, eni – 105 metr. Beıbarys soǵys jaǵdaıynda Kaır turǵyndaryna pana bolsyn degen maqsatpen osyndaı tórt dálizi bar meshit-qamal turǵyzǵan. Musylmandar bes ýaqyt namaz oqý úshin meshittiń úsh záýlim qaqpasy arqyly kirgen. Aıta ketetin jaıt, keıin Beıbarys sultan aııýbıdter dáýirinde jabylyp qalǵan ataqty ál-Azhar meshitin qaıtadan kúrdeli jóndeýden ótkizgen. Meshittiń aýqymyn kóbeıtip, ishin bezendirý úshin shet elderden mármár tastar men qymbat aǵashtardy aldyrǵan. Meshittiń qurylysy eki jylda aıaqtalǵan. Búginde mysyrlyqtar Kaır shaharynyń az-Zahır Beıbarys meshiti ornalasqan aýdandy az-Zahırııa aýdany dep ataıdy.
