BAS MÚFTI BILIKTILIKTI ARTTYRÝ OQÝ KÝRSYNDA DÁRIS OQYDY (FOTO)
Qazaqstan musylmandary dinı basqarmasynyń tóraǵasy Naýryzbaı qajy Taǵanuly Almaty qalasyna barǵan saparynda Nur-Múbarak Egıpet ıslam mádenıeti ýnıversıtetinde «Dinı ońaltý jumystaryn júrgizýdiń tıimdi tásilderi» taqyrybyndaǵy biliktilikti arttyrý oqý kýrsynyń ashylýyna qatysty.
Kýrstyń ashylý saltanatyna Nur-Múbarak Egıpet ıslam ýnıversıtetiniń rektory Mýhammad ash-Shahhat ál-Jındı qatysyp, quttyqtaý sóz sóıledi. Is-sharaǵa naıb múftı Kenjeáli Qońyratbaıuly, Bas múftı keńesshisi Bıjigit Nurjigituly, QMDB dinı ońaltý bóliminiń meńgerýshisi Hasan Amanqul, Dinı Ekstremızmge qarsy is-qımyl akademııasynyń dırektory Tımýr Núsiphanuly jáne Almaty qalasynyń bas ımamy Tólebı Dádiluly men aımaqtardaǵy dinı ońaltý salasyna jaýapty ımamdar, ustazdar qatysty.
Bas múftı Naýryzbaı qajy Taǵanuly QMDB bekitken jeti baǵyttyń biri dinı ońaltý jumysynyń mańyzyna toqtaldy. Biliktilikti arttyrý kýrsyna qatysýshy mamandarǵa «Dinı ońaltý jumysynda daǵýattyń tásilderi men ádisteri» taqyrybynda dáris oqydy. Qatysýshylar tarapynan qoıylǵan suraqtarǵa jaýap berip, dinı ońaltý baǵytyndaǵy jumys tájirıbelerimen bólisti.
Oqý barysynda Nur-Múbarak Egıpet ıslam ýnıversıtetinde bilikti dintanýshy mamandar, teologtar men Dinı Ekstremızmge qarsy is-qımyl akademııasynyń mamandary dárister oqyp, dinı ońaltý jumystarynyń ádistemelik usynymdary jaıly, teorııasy men tájirıbesi, dinı pikir qaıshylyqtyń sebepteri men aldyn-alý jóninde bilim beredi.
