Bas múftı: Biz ýaqytqa táýeldimiz (FOTO)

Elordada ótip jatqan «Jalyndy jastar yntymaǵy» respýblıkalyq jastar forýmynda Bas múftı Naýryzbaı qajy Taǵanuly osylaı dedi.

«Kez kelgen nárse belgili bir ýaqytpen jaratylǵan. Árbir is belgili bir ólshemmen belgilenedi. Sol ólshemderdiń biri – adamnyń ómirge kelýi, er jetýi, qartaıyp, dúnıeden ozýy. Ýaqyt bizge emes, biz ýaqytqa táýeldimiz. Óıtkeni ýaqytty biz qalaǵan kezimizde uzartyp, qalaǵan kezimizde qysqarta almaımyz. Ýaqyttyń ólshemi – Uly Jaratýshynyń quzyryndaǵy másele. Ýaqyt aldynda musylmannyń eki mindeti bar.

Birinshisi – ýaqytty júıeleý. Musylmannyń mindeti – árbir amalynyń ishinen mańyzdysyn tańdap alý. Árbir istiń dúnıelik nemese aqyrettik paıdasy bar ma, joq pa? Áýeli soǵan mán berý kerek.

Ekinshisi – bos ýaqytty tıimdi paıdalaný. Bos ýaqyt – Allanyń bizge bergen uly nyǵmeti. Biz tıisinshe shúkir etýimiz kerek. Bizdiń shúkirimiz – bos ýaqytymyzdy joǵary baǵalap, paıdaly isterge jumsaý. Paıǵambarymyz (oǵan Allanyń salaýaty men sálemi bolsyn): «Adamdardyń kóbi qadirine jete bermeıtin eki nyǵmet bar, ol – densaýlyq jáne bos ýaqyt», – degen. Sondyqtan ýaqytty qatelikke, ókinishke, paıdasyz áńgime-dúkenge emes, kerisinshe ózimizge de, ózgege de paıdasy tıetin isterge jumsaǵanymyz abzal», – dedi Naýryzbaı qajy Taǵanuly.

Sondaı-aq Bas múftı kimde-kim óziniń bir kúnine esep berip otyrsa, júris-turysyna, ómir tirshiligine jańasha qaraýyna jol ashatynyn alǵa tartty. «Bul – burynǵy izgi, taqýa kisilerdiń salyp ketken sara joly» dedi QMDB Tóraǵasy.