Bas múftı: Destrýktıvti dinı aǵym ıdeologııasyna jol bermeý qajet (FOTO)
Keshe elordada ótken Qazaqstan musylmandary dinı basqarmasynyń 2022 jylǵa arnalǵan keńeıtilgen Tóralqa májilisinde Bas múftı Naýryzbaı qajy Taǵanuly dinı ońaltý baǵyty boıynsha keshendi jumystar atqarylatynyn atap ótti.
«Destrýktıvti jáne radıkaldy dinı aǵymdardyń taralýyna ıdeologııalyq turǵydan qarsy turý jumysyn júıeli túrde atqarý – bizdiń basty nazarymyzda» degen QMDB Tóraǵasy biz ustanǵan dinı jol atadan balaǵa mura bolyp qalǵan musylmandyq mektep ekenine basty nazar aýdardy.
Sondaı-aq Bas múftı Dinı basqarma nasıhat jumystarynda áýlıe-hákimder men ahýn-ıshandardyń, bı-sheshender men aqyn-jyraýlardyń jáne din qaıratkerleriniń ulaǵatty sózderin basshylyqqa alatynyn alǵa tartty.
«Islam dini áldebir ult pen násilge tıesili emes. «Arabtyń arab emesten, arab emestiń arabtan, aqtyń qaradan, qaranyń aqtan artyqshylyǵy joq» dep hadıste aıtylǵandaı, Allanyń quzyryndaǵy artyqshylyq dindarlyqpen ǵana ólshenedi», – dedi Naýryzbaı qajy Taǵanuly.
