BAS MÚFTI DOSAN AÝYLYNDA JAŃA MEShITTIŃ AShYLÝYNA QATYSTY (FOTO)

Búgin Qyzylorda qalasy Qosshyńyraý aýyldyq okrýgine qarasty Dosan aýylynda jańa meshit ashyldy. Saýranbaı bolys atyn ıemdengen meshittiń ashylýyna QMDB Tóraǵasy, Bas múftı Naýryzbaı qajy Taǵanuly arnaıy qatysty.

2017 jyly jergilikti jamaǵattyń atsalysýymen bastalǵan qulshylyq úıi 100 adamǵa arnalǵan.

«Aısha anamyz (Alla oǵan razy bolsyn): «Paıǵambarymyz (oǵan Allanyń salaýaty men sálemi bolsyn) aýyl aımaqtarda meshit salynýyn, olardyń taza ustalýyn jáne hosh ıispen juparly bolýyn ámir etti» degen. Taǵy bir hadısinde Alla elshisi (oǵan Allanyń salaýaty men sálemi bolsyn) «Alla Taǵalaǵa eldi mekenniń eń kórikti jerleri – meshitter» deıdi. Osyndaı meshitti tartý etip, jaqsylyq jasaýǵa asyǵyp, saýap alsaq dep júrgen Ózderińizge Alla razy bolsyn! Allany eske alyp, únemi qulshylyqta, izdeniste, taqýalyqta júrgen jan tek jaqsylyq oılaıdy. Endeshe búgingi meshitimiz qaıyrly, qutty bolǵaı. Qýanyshtaryńyz eselene bersin» dep Bas múftı jıylǵan jurt aldynda izgi tilegin arnady.

Meshit ashylýynan soń QMDB Tóraǵasy aýyl turǵyndarymen birge qulshylyq úıin kórip, Syr óńirinen shyqqan dinı aǵartýshylardyń rýhyna Quran aıattaryn baǵyshtady.