BAS MÚFTI: Eldigimizdi kórsetip, eńsemizdi túsirmeıik (VIDEO)
Asa Qamqor erekshe Meıirimdi Allanyń atymen bastaımyn!
Qadirli qaýym!
Memleket basshysy Qasym-Jomart Toqaev elde bolǵan jaǵdaılarǵa baılanysty Qazaqstan halqyna úndeýin jarııalap: «Bizdiń tarıhymyzdaǵy osy bir qıyndyqty tez arada eńseretinimizge eshqandaı kúmán joq. Eń bastysy, bolashaqta mundaı oqıǵalardyń qaıtalanýyna jol bermeý kerek. Qasterli Otanymyz – Qazaqstan álem kartasyndaǵy egemen el retinde qýatty memleketke aınalady, Ekonomıkamyz anaǵurlym qarqyndy damıdy, azamattarymyzdyń áleýmettik jaǵdaıy jaqsara túsedi. Men muny zor senimmen aıtyp turmyn» dep atap ótti. Prezıdentimizdiń halyqqa joldaǵan Úndeýi eńsesi túsken eldiń rýhyn kóterip, jurtymyzdyń jigerin oıatty. Qasym-Jomart Kemeluly syn saǵatta sabyr saqtap, ustamdylyq tanytqan ultymyzǵa aıryqsha alǵysyn bildirdi.
Osy rette biz de birligin kórsetken barsha jamaǵatqa rızashylyq bildiremiz. Osy kúnderde, ıaǵnı halqymyzdyń basyna kún týǵan shaqta musylman jamaǵaty eldiń birligi men tynyshtyǵy úshin duǵa jasaýda. Sonymen qatar Reseı, Ózbekstan, Qyrǵyzstan taǵy basqa elderdegi din qaıratkerleri juma namazynda bizdiń halqymyz úshin duǵa etip, ıgi nıetterin bildirýde. Alla razy bolsyn! Alla Taǵala bul synaqtan da aman ótýdi násip etsin.
Qurmetti jamaǵat!
Qazaqstan musylmandary dinı basqarmasy el turǵyndaryn qazirgi jaǵdaıǵa baılanysty jalǵan aqparattar men jalǵan urandarǵa aldanyp, arandap qalmaýǵa úndeıdi. Biz úshin dál qazirgi ýaqytta eldiń amandyǵy, jurttyń tynyshtyǵy qymbat.
Musylman qaı kezde de beıbitshilikti, tynyshtyqty, tatýlyqty ózine serik etedi.
Ardaqty Paıǵambarymyz (oǵan Allanyń salaýaty men sálemi bolsyn) hadısinde: «Naǵyz musylman – ózge musylmandarǵa tilimen de, qolymen de zııan tıgizbegen adam» degen bolatyn. Sondyqtan bárimiz úshin osyndaı syn saǵatta memleketimizdiń tynyshtyǵy, halqymyzdyń amandyǵy, táýelsizdigimizdiń baıandy bolmaǵy mańyzdy.
Alla Taǵala Quranda «Baqara» súresiniń 191-aıatynda bylaı deıdi: «Búlik shyǵarý – kisi óltirýden de aýyr is».
Ardaqty Paıǵambarymyz (oǵan Allanyń salaýaty men sálemi bolsyn) hadısinde: «Fıtna (búlik shyǵarý) – uıyqtap jatqan nárse, ony oıatqanǵa Alla qarǵys atsyn», – degen.
Óıtkeni búliktiń sońy jaqsylyqqa alyp barmaıdy. Mundaı búlikter eldiń tynyshtyǵyn, qoǵamnyń turaqtylyǵyn buzady.
Sonymen qatar, búliktiń saldary qoǵamǵa, memleket Ekonomıkasyna keri áserin tıgizedi. Nátıjesinde zardabyn memleket pen halyq tartady. Al musylman adam qoǵamǵa zııanyn emes, paıdasyn tıgizýi kerek.
Ardaqty aǵaıyn!
Jýyrda Qazaqstan musylmandary dinı basqarmasy Sherýge qatysýdyń úkimi jaıynda pátýa qabyldady. Sherý kezinde memleket pen jeke tulǵalardyń jyljyıtyn jáne jyljymaıtyn múlikterine zııan keltirilmeý (jaǵý, syndyrý, tonaý t.b.) kerek.
Sherýdiń sońy búlikke, arandatýǵa alyp barsa, ondaı sherýge shyǵý – úlken kúná, haram.
Biz qashan da Islam dini tynyshtyq ornaǵan qoǵamda ǵana órkendeıtinin nasıhat jumystarynda aıtyp kelemiz. Ózderińizge belgili, eldiń qaýipsizdigi úshin meshitterimizde juma namazyn oqýǵa shekteý qoıyldy. Halqymyz elde turaqtylyq bolǵan kezde ǵana erkin qulshylyq jasaýǵa bolatynyn túsinip, osy jaǵdaılardan sabaq aldy dep oılaımyn.
Qurmetti otandastar!
Qazaqstan Respýblıkasynyń Prezıdenti Qasym-Jomart Kemeluly táýelsizdigimizge qater tóngen syn saǵatta shuǵyl sheshim qabyldap ári batyl qadamǵa baryp, sodyrlardyń ozbyrlyq áreketinen elimizdi aman alyp qaldy. Allaǵa sheksiz shúkir aıtamyz.
Jaratýshy Jabbar Iemiz Otan aldyndaǵy boryshyn óteý kezinde opat bolǵan sarbazdarymyzdy meıirimine bólep, ımanyn ózine serik etkeı. Marqumdardyń týystaryna qaıǵyra kóńil aıtamyz. Al jaraqat alǵan jandardyń tez arada saýyǵyp ketýin tileımiz.
Endigi maqsat – eldigimizdi kórsetip, halyq bolyp, Prezıdentimizdiń bastamalaryna qoldaý kórsetip, yntymaǵy myǵym jurt ekenimizdi taǵy da álemdik qaýymdastyq aldynda pash etý. Eldigimizdi kórsetip, eńsemizdi túsirmeıik. Birligi myqty elimizdiń táýelsizdigine eshkim de nuqsan keltire almaıdy. Biz - birgemiz!
Alla Taǵala elimizge amandyq, halqymyzǵa tynyshtyq násip etip, táýelsizdigimizdi baıandy etkeı. Ámın!
Naýryzbaı qajy TAǴANULY,
QMDB Tóraǵasy, Bas múftı
