Bas múftı Elordada juma ýaǵyzyn júrgizdi (FOTO)
QMDB Tóraǵasy, Bas múftı Naýryzbaı qajy Taǵanuly elordadaǵy «Sádýaqas qajy Ǵylmanı» meshitinde juma ýaǵyzyn júrgizdi.
Kúnderdiń sultany jumada «Sádýaqas qajy Ǵylmanı» meshitine arnaıy kelgen Bas múftı aldymen «Dinge beriktik (ıstıqama)» taqyrybynda ýaǵyz aıtty. Árbir musylmannyń ómirinde mańyzdy bolǵan dinge beriktik máselesine toqtala kelip:
«Pendeniń Jaratýshysyn tanyp, aqıqatty moıyndap, týra jolǵa túsýi – Alla Taǵalanyń ol úshin bergen eń úlken nyǵmeti. Alaıda, adam balasynyń tabıǵatynda álsireý, ózgerý syndy sıpattar bar. Osy sebepti keı adamdar ózindik ustanymynan aýytqyp, oryndap júrgen qulshylyqtaryna enjarlyq tanytyp, tastap qoıyp jatady. Bulaı isteý – qansha ýaqyt qınalyp úı turǵyzyp, keıin ony buzyp tastaýdyń mysalyna uqsas», – dedi Bas múftı.
Naýryzbaı qajy Taǵanuly momyn-musylmandardyń dinge berik bolýyna, týra joldan aınymaı júrýine sebep bolatyn amaldar jaıynda arnaıy toqtalyp ótti.
Odan keıin jamaǵatqa ımam bolyp juma namazyn oqyǵan QMDB tóraǵasy el men jerdiń amandyǵy, halqymyzdyń beıbitshiligi men tynyshtyǵy úshin arnaıy duǵa jasady.
Bas múftı ýaǵyzyn tyńdaǵan meshit aqsaqaldary namaz sońynda aq batasyn berip, rızashylyǵyn bildirdi.
