Bas múftı Er-Rııadta ótip jatqan halyqaralyq konferentsııada baıandama jasady (FOTO)
Búgin Saýd Arabııa Koroldiginiń astanasy Er-Rııad qalasynda Dúnıejúzilik Islam Lıgasynyń uıymdastyrýymen «Din ustanýshylar arasyndaǵy ortaq qundylyqtar forýmy» bastaldy.
Jıyndy Dúnıejúzilik Islam Lıgasynyń Bas hatshysy Muhammed ıbn Abdýlkarım ál-Issa ashty. Ol óz sózinde búkil din ustanýshylardy birlikke, turaqtylyqqa úles qosýǵa shaqyrdy.
Konferentsııaǵa álemniń 100 memleketinen delegat qatysýda. Onyń ishinde QMDB Tóraǵasy, Bas múftı Naýryzbaı qajy Taǵanuly arnaıy quttyqtaý sóz sóılep, jıynnyń mańyzyna toqtala kele Dúnıejúzilik Islam Lıgasynyń Bas Hatshysyna ortaq dıalog alańyn usynǵany úshin rızashylyǵyn jetkizdi.
«Bizdiń munda jınalýdaǵy basty maqsatymyz álemniń tynyshtyǵy jolynda duǵada bolý. Búkil jer betindegi adamzat Adam (ǵ.s) Atadan taraımyz. Sondyqtan qandaı da bir din ókili bolsaqta bir birimizge qurmetpen qaraýǵa tıispiz. Eń basty qundylyq ol – adamgershilik qaǵıdatyn ustaný. Búgingi jıyn soǵan úndeıdi. Óıtkeni álemdegi kóptegen din ókilderi tuńǵysh ret arab jerinde bas qosyp otyr. Osyndaı mańyzdy jıyndy uıymdastyrýshy Dúnıejúzilik Islam Lıgasynyń aldaǵy jumysyna tabys tileımiz», – dedi Bas múftı.
Sonymen qatar, búgingi konferentsııada Eýropa, Azııa, Afrıka men AQSh-tan kelgen álemdik din kóshbasshylary sóz alyp, jahandyq turaqtylyq jolynda birge bolýǵa úndedi.
