Bas múftı GACA uıymy basshysymen kezdesti (FOTO)
QMDB Tóraǵasy, Bas múftı Naýryzbaı qajy Taǵanuly Saýd Arabııa astanasyndaǵy General Authority of Civil aviation uıymynda bolyp, SAK Azamattyq avıatsııa basqarmasynyń Ekonomıkalyq saıasat jáne áýe kóligi jónindegi vıtse-prezıdenti Álı Radjabpen kezdesti.
Ekijaqty kezdesýde negizinen qajylardy tasymaldaý máselesi talqylandy. Óıtkeni bul uıym dúnıejúzi boıynsha charterlik reısterdi uıymdastyrýda 50/50 qaǵıdatymen jumys isteıdi. Bas múftı bastaǵan delegatsııany jyly qabyldaǵan Álı Radjab myrza áriptestik baılanys ornatýǵa nıetti ekenin jetkizdi.
«Men birneshe jyl buryn Qazaqstanda jylǵa jýyq jumys istedim. Maǵan óte qatty unady. Bıyl taǵy barýǵa nıettimin. Allaǵa shúkir, úlken qajylyq maýsymy ashylyp jatyr. Degenmen sharttary burynǵydaı emes. Bizdiń baǵyt týraly aıtar bolsam, 50/50 qaǵıdatyn ózgerte almaımyz. Búkil álemge osy júıe qoıylǵan. Keıbir memleketterde áýe kompanııalarynyń sapasy tómen. Qajylardy tasymaldaýǵa qaýqarsyz. Sondyqtan biz ekinshi taraptan ushaq jiberýge májbúrmiz. Eger qazaqstandyq kompanııalar sizderge bólingen adam sanyn qasıetti qalalarǵa jetkize almasa, onda biz kómektesemiz. Keı memleketter buǵan bıznes retinde qaraıdy. Sol sebepti baǵa sharyqtap ketedi», – dedi ol.
Óz kezeginde Bas múftı áýe tasymalynyń sapasyn arttyrý, ushaqtardyń keshikpeýi, qajylardyń aman-esen qulshylyǵyn óteýi jáne baǵanyń qolaıly bolýyn surady. Óıtkeni qazirgi usynylǵan baǵa qajylardyń qaltasyna salmaq salatynyn atap ótti. Uıymnyń vıtse prezıdenti Bas múftıdiń baǵa saıasatyna baılanysty aıtqan usynysyn aıaqsyz qaldyrmaıtynyn jetkizdi. Sondaı-aq Álı Radjab myrza qosymsha áýe kompanııalaryn jumyldyrýǵa bolatynyn aıtty. Bul másele boıynsha aldaǵy ýaqytta taǵy da birneshe áýe kompanııalarymen kelissózder júrgizilmek.
