BAS MÚFTI ǴYLYMI KONFERENTsIIaDA BAIaNDAMA JASADY

Nur-Sultan meshitinde ótken «Qazaq handyǵy dáýirindegi Islam órkenıeti» respýblıkalyq ǵylymı-tanymdyq konferentsııasynda Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Haziret baıandama jasady. 

Bas múftı óz sózinde qazaq halqynyń rýhanı tarıhy Altyn Orda dáýirimen tyǵyz baılanysty ekenin atap ótip, sol kezeńde qalyptasqan dinı-rýhanı muranyń keıin Qazaq handyǵy dáýirinde jalǵasyn tapqanyn aıtty.

«Búgingi qazaq rýhanııatynyń negizderi sol tusta qalandy. Fıqh iliminde Imam Aǵzam Ábý Hanıfa, dinı senim mektebinde Imam Matýrıdı, al ıhsan iliminde Ahmet Iasaýı ilimderi Altyn Ordanyń negizgi rýhanı keńistigin qalyptastyrdy», – dedi Bas múftı.

QMDB tóraǵasynyń aıtýynsha, qazaq halqy Joshy ulysynan óz enshisin alǵan kezde rýhanııattaǵy «hanafı-matýrıdı-ıasaýı» úshtaǵanyn birge alyp keldi. Keıin ıslamdyq kózqaras pen túrkilik dúnıetanym Qazaq handyǵynda ózara sabaqtasyp, din men dástúrdiń úılesimi nyǵaıa tústi.

Bas múftı sondaı-aq qazaq qoǵamyndaǵy dinı jáne ulttyq qundylyqtardyń tutastanýyna bı-sheshender ınstıtýty, aqyn-jyraýlar jáne halyqtyń aýyz ádebıeti eleýli úles qosqanyn atap ótti. Sonyń nátıjesinde dala bolmysyna negizdelgen dástúrli dinı dúnıetanym qalyptasqanyn jetkizdi. Sondaı-aq, babalardan qalǵan osy rýhanı murany qazirgi ıslamtaný jáne dintaný ǵylymy turǵysynan zerttep, zerdeleýdiń mańyzdylyǵyna toqtaldy.