BAS MÚFTI «HIBATÝLLA TARAZI» MEShITINDE JUMA ÝAǴYZYN AITTY
Búgin Qazaqstan musylmandary dinı basqarmasynyń tóraǵasy Naýryzbaı qajy Taǵanuly Taraz qalasynyń «Hıbatýlla Tarazı» meshitinde juma ýaǵyzyn aıtty.
«Máshhúr Júsip jáne onyń rýhanı murasy» taqyrybynda ýaǵyz aıtqan Bas múftı: «Máshhúr Júsip Kópeıuly – qazaq dalasynyń dinı jáne rýhanı kemeńgeri, onyń qaldyrǵan mol murasy halyqtyń ulttyq sanasynyń qalyptasýynda, dinı dúnıetanymynyń tereńdeýinde erekshe mańyzǵa ıe. Ǵulama óz shyǵarmalarynda ıslam dininiń ımanı negizderin ǵana emes, sonymen qatar qazaqtyń dástúrli mádenıetimen sabaqtastyǵyn jan-jaqty ashyp kórsetti. Ol dindi adam ómiriniń barlyq salasymen baılanystyra otyryp, ony jeke tulǵanyń rýhanı jetilýiniń basty tetigi retinde qarastyrdy.
Ózderińizge málim, sharıǵatymyzda áýlıeler – Alla Taǵalanyń súıgen quldary. Rabbymyz olardy bul dúnıede de, aqyrette de aıryqsha sıpattarmen atap, dárejelerin kótergen. Quran Kárimde Jaratýshy Jabbar Iemiz: «Bilip qoıyńdar, rasynda, Allanyń áýlıe quldary úshin eshqandaı qorqynysh pen qaýip-qater joq. Olar – shynaıy túrde ıman keltirgender hám taqýalyqty ustanǵandar. Olardy bul dúnıede de, aqyrette de súıinshileımiz. Allanyń sózderinde (hám úkimderinde) ózgeriske jol berilmeıdi. Mine, eń uly jetistik, eń zor tabys – osy», – degen» dedi.
Juma namazynan keıin QMDB Tóraǵasy «Hıbatýlla Tarazı» meshitiniń jamaǵatymen birge duǵa jasap, Alla Taǵaladan elimiz ben jerimizdiń tynyshtyǵyn, amandyǵyn tiledi.
