BAS MÚFTI INDONEZIIa DELEGATsIIaSYN QABYLDADY (FOTO)
QMDB Tóraǵasy Naýryzbaı qajy Taǵanuly Álemdik dinder lıderleriniń VII sezi aıasynda Indonezııanyń «Nahdlatýl Ýlama» Atqarýshy keńesiniń Bas tóraǵasy Iahıa Holıl Stakýfty qabyldady.
Kezdesýde resmı ókil Indonezııa eli úshin Qazaqstan musylmandary dinı basqarmasymen áriptestik baılanys ornatý asa mańyzdy qadam ekenin atap ótti. Sondaı-aq jetinshi ret ótip otyrǵan Álemdik dinder lıderleri seziniń halyqtar dostyǵy men ártúrli senim ıeleriniń ózara túsinistik alańyna aınalǵanyn tilge tıek etti.
Basqosýda Bas múftı men Indonezııa delegaty dinı aǵartý, halal ónimderdi standarttaý, Qazaqstan jáne Indonezııa Ǵulamalar keńesi arasynda áriptestik yntymaqtastyqty arttyrý, oqý-bilim salalary boıynsha baılanysty nyǵaıtý máselesin talqylady. Odan bólek Naýryzbaı qajy Taǵanuly Dinı basqarmanyń basty jeti baǵyt boıynsha jumysy jaıly baıandap berdi. Kezdesý sońynda taraptar oqý-aǵartý, bilim-ǵylym, halal standarttaý salasy boıynsha ortaq jobalardy júzege asyrýǵa ýaǵdalasty.
Aıta keteıik, Indonezııa – musylmandar eń kóp shoǵyrlanǵan memleket. 273 mıllıonnan astam halqynyń 83 paıyzy Islam dinin ustanýshylardyń úlesinde. Atalǵan elde 30-ǵa jýyq Islam ýnıversıteti bar. Onyń 23-i memlekettik ýnıversıtet eken.
