Bas múftı «Izgilik jarshysy» medıaforýmynda baıandama jasady (FOTO)
Qazaqstan musylmandary dinı basqarmasy ǵımaratyndaǵy «ál-Farabı» zalynda ótip jatqan «Izgilik jarshysy» respýblıkalyq medıaforýmynda Bas múftı Naýryzbaı qajy Taǵanuly baıandama jasady.
QMDB Tóraǵasy alqaly jıynǵa qatysyp otyrǵan BAQ jetekshileri men medıa ókilderine rııasyz rızashylyq nıetin jetkize kelip, búgingi forým múftııattyń aqparat salasyndaǵy jumysyna serpin beredi degen senim bildirdi.
Bas múftı qazaq halqy ejelden sózdi qasterlegenin, sózdiń parqyn aıyra bilýge baýlyǵanyn aıta kelip, sóz ustaǵan, qalamnyń qasıetin uǵynǵan jandar din taqyrybyn qozǵarda asa abaı bolýy kerektigin tilge tıek etti. «Din názik másele bolǵandyqtan, bul taqyrypqa asqan jaýapkershilikpen qaraý qajet. Óıtkeni adamnyń senimi – oǵan qaırat beretin kúsh ári pendeniń eń álsiz tusy. Sondyqtan bireýdiń senimin qorlaýdan artyq qııanat joq», – dedi Naýryzbaı qajy Taǵanuly.
Sondaı-aq QMDB Tóraǵasy aqparat alańynda túrli kereǵar pikirlerdiń, pikirtalastardyń bolyp jatatynyn, alaıda sondaı pikirtalastardyń adamnyń jeke basyna tıisý, dinı senimin mansuqtaý, abyroıyn tógý sekildi baǵyt alyp ketetinine qynjylyp, kórkem pikirtalastardyń kórinis tappaı jatqanyna alańdaýshylyq bildirdi.
«Ardaqty Paıǵambarymyz (oǵan Allanyń sálemi men salaýaty bolsyn): «Jaqsy sóz sóıle nemese úndeme», – degen. Paıǵambardyń osy ónegesi bar árbir túısikte jańǵyryp tursa deımiz. Alla Taǵala «Hýjýrat» súresiniń 6-aıatynda: «Áı, múminder! Buzyq bireý habar keltirse, ony anyqtańdar. Áıtpese bilmeı bir elge kesirleriń tıip, istegenderińe ókinesińder», – deıdi. Alla Taǵala joǵarydaǵy aıatta kez-kelgen jaǵymsyz habardy elge jaımas buryn, aldymen anyqtap alýdy buıyrdy. Áıtpegen jaǵdaıda elge kesiri tıip, ókinish arqalaıtynyn eskertip otyr. Buryn babalarymyz el ishin búldiretin jantúrshigerlik sumdyq soıqandar men qarajúrek qııanattardy «mal qulaǵy sańyraý» dep, tamyr alyp, taralyp ketýinen saqtanyp, elge jaımaıtyn. Ókinishke qaraı qazir adam qulaǵyna aýyr estiletin, tóbe shashyńdy tik turǵyzatyn jekkórinishti hám jıirkenishti ister aramshópteı qaýlap órship bara jatqany janyńdy aýyrtady», – dedi Bas múftı.
Sóziniń sońynda QMDB Tóraǵasy babalarymyzdyń din men dástúrdi danalyqpen úılestirip, ónegeli ómir saltyn qalyptastyrǵanyn alǵa tartyp, qalam ustaǵan qaýymdy izgilik, qaıyrymdylyq, adamgershilik qundylyqty kóbirek nasıhattaýǵa shaqyrdy.
