BAS MÚFTI HALYQARALYQ KONFERENTsIIaDA BAIaNDAMA JASADY (FOTO)
Bas múftı Naýryzbaı qajy Taǵanuly Nur-Múbarak ýnıversıtetinde ótip jatqan fılologııa ǵylymdarynyń doktory, professor, QMDB Ǵulamalar keńesiniń múshesi Shamshádın Kerimniń 60 jyldyǵyna arnalǵan halyqaralyq ǵylymı-teorııalyq konferentsııada arnaıy baıandama jasady.
QMDB Tóraǵasy kórnekti ǵalym, ulaǵatty ustaz Shamshádın Tursynulynyń Qazaqstan men Mysyr elderi arasynda rýhanı, aǵartýshylyq jáne bilim-ǵylym salasyndaǵy altyn kópir bolǵanyn, Nur-Múbarak ýnıversıtetiniń qalyptasýy men damýyna kóp eńbek sińirgenin atap ótti. Sondaı-aq ǵalymnyń ádebıettaný, shyǵystaný, ıslamtaný ǵylymyna sińirgen eńbegine toqtaldy.
«Shamshádın Tursynuly ıslamtaný salasyn zerttep qana qoımaı, kóptegen jas ǵalymdardy tárbıelep shyǵarǵan ulaǵatty ustazǵa aınaldy. Búginde Shamshádın ustazdyń shákirtteri Qazaqstan musylmandary dinı basqarmasynda, basqa da qurylymdarda qyzmet etip, asyl dinimizdiń aıasyn keńitý maqsatynda tabysty qyzmet atqaryp keledi. Ol qazaq dalasynan shyqqan din ǵulamalarynyń ómiri men qyzmetin zerttep, kópshilikke tanystyrdy. Atap aıtqanda, Qaýam ad-dın ál-Itqanı ál-Farabıdiń, Husam ad-Dın as-Syǵanaqıdiń, Múbashshır at-Tarazıdiń ómiri men shyǵarmashylyǵyn tereńdete zerttep, ǵylymı aınalymǵa engizdi. Sonyń ishinde Taraz óńirinen shyqqan ákeli-balaly Tarazıler jaıly jazǵan eńbekteri bizdiń Dinı basqarma janynan shyǵatyn «Munara» gazetiniń birneshe sanynda jaryq kórdi. Osy eńbekteri negizinde «Taraz tarlany» atty jańa kitaby oqyrman qolyna tıgeli otyr» dep atap ótti.
Sondaı-aq Bas múftı Qazaqstan musylmandary dinı basqarmasy Ǵulamalar keńesiniń múshesi retinde Shamshádın Kerimniń dinimiz ben rýhanııatymyzdyń damýyna atsalysyp, dinı tutastyqty qalyptastyrýda súbeli úles qosyp kele jatqanyn alǵa tartty.
«Ardaqty Paıǵambarymyz (oǵan Allanyń salaýaty men sálemi bolsyn) bir hadısinde: «Shynynda, ǵalymdar – paıǵambarlardyń muragerleri, al paıǵambarlar ózderinen keıin dınar da, dırham da qaldyrmady. Olar bilimdi ǵana mura etti. Kimde-kim bilim alsa, uly sybaǵaǵa qol jetkizedi» degen. Alla elshisi ǵalymdardy paıǵambarlardyń muragerlerine teńeý arqyly ǵalymdardyń aıryqsha ardaqtalǵan adamdar ekenin bildirip otyr. Shamshádın Tursynuly – ǵylym men bilim, dinı aǵartý salasyna úlken úles qosyp kele jatqan iri ǵalym. Shákirtterge dáris oqyp, olardyń ǵylymmen aınalysýyna jaǵdaı jasap, qushtarlyǵyn oıatqan ulaǵatty ustaz» deı kelip, ǵalymnyń denine saýlyq, otbasyna amandyq, qyzmetine jemis, shyǵarmashylyǵyna tabys tiledi.
