BAS MÚFTI «HASEKIGE» QABYLDANǴAN ShÁKIRTTERGE AQ JOL TILEDI (FOTO)
Búgin elordada Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Túrkııadaǵy «Hasekı» akademııasyna oqýǵa qabyldanǵan shákirttermen kezdesti.
QMDB men Túrkııa Din isteri basqarmasy arasyndaǵy memorandým aıasynda 2022-2023 oqý jylyna synaq tapsyrǵan júzge jýyq talapkerdiń 24-i úzdik dep tanylǵan bolatyn.
«Asyl dinimizde bilim alý er men áıelge birdeı paryz sanalady. Árıne, týǵan jerden, aǵaıyn-týystan jyraqta júrýdiń synaǵy bolady. Soǵan sabyr etip, bastysy, izgi nıetpen baryp, shynaıy yqylaspen bilim alyńyzdar. Qazaqstan musylmandarynyń qara shańyraǵy Dinı basqarmanyń qamqorlyǵyn sezinip, qadirin túsinip, elge, dinge qyzmet etý basty maqsattaryńyz bolǵaı. Alla Taǵala paıdaly bilim násip etip, elge aman-esen oralýlaryńyzdy jazsyn» dep jyly lebizin bildirdi Bas múftı.
Aıta keteıik, eki topqa bólingen shákirtter «Hasekı» akademııasynyń baǵdarlamasy boıynsha Túrkııanyń Kojaeli jáne Kaıserı qalalarynda bilim alady. Búgingi tańda osy oqý baǵdarlamasy boıynsha 100 shákirt bilim alyp, elge oraldy.
