Bas múftı kópbalaly otbasylardy qýanyshqa bóledi (FOTO)

QMDB Tóraǵasy, Bas múftı Naýryzbaı qajy Taǵanuly Nur-Sultan qalasyndaǵy kópbalaly otbasylar turatyn jataqhanaǵa arnaıy zııarat jasap, qasıetti Qurban aıt merekesimen quttyqtady.

Keń aýlaǵa qaz-qatar salynǵan bul páterlerde búginde toǵyz otbasy turyp jatyr. 30-ǵa jýyq bala kelgen qonaqtardy aıtpen quttyqtap, jamyraı qarsy aldy. Balalardyń barlyǵyna arnaıy aıttyq syılyqtary úlestirilip, sábılerdiń shat kúlkisi men analardyń aq batasy aýladaǵy mereke mereıin arttyra tústi. Otbasylardyń barlyǵyna alǵashqy qurbandyq etteri berilip, Bas múftı Naýryzbaı qajy Taǵanuly aıt merekesimen quttyqtap, izgi lebizin bildirdi.

Turǵyndar da qonaqtarǵa óz iltıpattaryn bildirip, aıttyq dastarqanyna shaqyrdy. Qazaqy saltymyzǵa saı esik aldynan qolǵa sý quıyp, súlgi ustaǵan balaqaılar úlkenderden bata alǵanyna taǵy bir qýanyp, merekelik kóńil-kúıge bólendi.