Bas múftı «Kóshpeli kerýen» qaıyrymdylyq sharasyna qatysty (FOTO)
Búgin QMDB tóraǵasy, Bas múftı Naýryzbaı qajy Taǵanulynyń qatysýymen respýblıkanyń barlyq óńirinde bir mezette «Kóshpeli kerýen» qaıyrymdylyq sharasy ótti.
«Zeket» qorynyń uıymdastyrýymen ótken ıgi shara elordada bastalyp, elimizdiń túkpir-túkpirinde bir mezette jalǵasty.
«Kóshpeli kerýendi» bastap bergen Bas múftı Naýryzbaı qajy Taǵanuly: «Memleket basshysy Qasym-Jomart Toqaev bıylǵy Qazaqstan halqyna joldaǵan Joldaýynda: «Indetpen kúres dana halqymyzǵa tán asyl qasıetterdiń arqasynda júzege asty. Ózgege qolushyn sozyp, tileýles bolý, tosynnan kelgen keselge qarsy turý mańyzdy ekeni anyq baıqaldy» dep, qıyn sátte ózimizben qosa ózgege janashyrlyq tanytý – bizdiń boıymyzda babadan mıras bolyp kele jatqan, týa bitken qasıet ekendigin, osy birliktiń arqasynda atalǵan qıyndyqty kóp bolyp eńserip kele jatqandyǵymyzdy aıtqan bolatyn.
Óz kezeginde Qazaqstan musylmandary dinı basqarmasy da óńirlerdegi ımamdarymyzdyń kúshimen kóptegen qaıyrymdylyq sharalardyń basy-qasynda keledi. Al, myna búgingi «Kóshpeli kerýen» atty qaıyrymdylyq sharasy respýblıka boıynsha bir mezette barlyq óńirlerde 600-den astam muqtaj otbasyǵa kómek kórsetýge baǵyttalǵan», - dep aıryqsha atap ótti.
Búgin azyq-túlik qoraptaryn ımamdar men eriktiler muqtaj otbasylardyń úılerine deıin jetkizip berdi. Atalǵan qaıyrly is Dinı basqarmanyń «Ár aptaǵa bir shara» jobasyna saı jyl sońyna deıin jalǵasady. Búgingi qaıyrymdylyq sharasynda din qyzmetkerleri arnaıy kólikpen elimiz boıynsha 600-den astam muqtaj otbasynyń úılerin aralap, olardyń turmys jaǵdaılarymen tanysyp, azyq-túlik, kıim-keshek sııaqty qajetti kómek túrlerin kórsetti.
