Bas múftı Marat Toqashbaevpen júzdesti (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly Almaty qalasyna jasaǵan jumys sapary barysynda belgili qalamger, din janashyry Marat Toqashbaevpen kezdesti.
Kezdesýde jat aǵymdardyń teris ıdeologııasy, elimizdegi dinı ahýal jaıy sóz boldy.
Marat Toqashbaev júzdesý barysynda «Islam dini, musylman dese, lezde shabýyl jasaıtyn adamdar paıda boldy» deı kele, dinge topyraq shashýǵa daıyn turatyn toptarmen jumys isteý kerektigin alǵa tartty.
Óz kezeginde Bas múftı: «Siz – qalamyn serik etken elimizge belgili din janashyrlarynyń birisiz. Sizdiń eldiń ıgiligine baǵyttalǵan oı-pikirlerińizdi únemi eskerip otyramyz. Siz aıtyp otyrǵan jat aǵymdar – elimizdiń bereke-birligine, tutastyǵyna, azamattardyń ómirine qaýip tóndirýshiler. Sondyqtan olarmen kúres bizdiń – basty negizgi baǵytymyzdyń biri» dedi.
Kezdesý sońynda Naýryzbaı qajy Taǵanuly Marat Toqashbaevqa usynys-pikirleri úshin alǵys aıtyp, syı-sııapat jasady.
