BAS MÚFTI MAROKKODAǴY ÁL-QARAÝIN ÝNIVERSITETINIŃ REKTORYMEN KEZDESTI (FOTO)
Marokko Koroldigine jumys saparymen kelgen QMDB Tóraǵasy, Bas múftı Naýryzbaı qajy Taǵanuly alǵashqy kezdesýin Fes qalasynan bastady. Munda Dinı basqarma Tóraǵasy álemdegi eń kóne ýnıversıtettiń rektory doktor Amal Jálál myrzamen kezdesti. Oqý ordasynyń basshysy QMDB delegatsııasyn jyly qabyldap, iltıpat kórsetti.
«Bul ýnıversıtet 859 jyldan beri úzdiksiz bilim berip keledi. Bizdiń oqý ornymyz dástúrge saı ashyqtyq saıasatyn ustanamyz. Álem elderinen kelem deýshiler úshin esigimiz ashyq. Bolashaqta Sizderdiń Nur-Múbarak Egıpet Islam mádenıeti ýnıversıtetimen birlese jumys isteýge daıynbyz. Ózińizdi arnaıy ýnıversıtetpen tolyq tanysýǵa shaqyramyn» dedi rektor.
Óz kezeginde Bas múftı oqý ordasynyń basshysyna alǵysyn bildirip, bolashaqta ekijaqty shákirt tárbıeleý, tájirıbe almasý jaǵyn atap ótti.
«Islam dini adam balasyn únemi bilim alýǵa jeteleıdi. Sondyqtan dinimizde eń alǵashqy túsken Quran aıaty da «Oqy! Sondaı jaratqan Rabbyńnyń atymen oqy!» dep bastaldy. Sizdiń taraptan bolǵan ystyq yqylasyńyzǵa alǵysymdy bildiremin. Ózderińizben turaqty kelisim aıasynda birlese yntymaqta jumys isteýge daıynbyz. Bizdiń Marokko elindegi zııaratymyzdyń negizgi baǵyty da sol – eki el arasyndaǵy rýhanı baılanystardy arttyrý. Ál-Qaraýın álemdegi eń alǵashqy ýnıversıtet bolǵandyqtan musylman elderi arasynda da qyzyǵýshylyq týdyrady. Myńjyldyq tarıhy bar oqý ordasynda elimizdiń shákirtteri kelip oqysa deımiz. Alla Taǵala bilim ordasyna bereke berip, shákirtterdiń zeıini ashylsyn» dedi Bas múftı.
Ekijaqty kezdesýden soń QMDB Tóraǵasy iltıpat kitabyna izgi tilegin qaldyrdy. Keıin rektor ýnıversıtettiń kóne qoljazbalar bólimin kórsetip, túpnusqada saqtalǵan myńjyldyq tarıhy bar kitaptarmen tanystyrdy. Sondaı-aq Bas múftı bastaǵan delegatsııa ýnıversıtettiń eski keshenin aralap, búgingi tynysynan habardar boldy.
Aıta keteıik Ál-Qaraýın oqý orny Gınnestiń rekordtar kitabyna álemdegi eń alǵashqy ýnıversıtet ári úzdiksiz jalǵasyp kele jatqan bilim berýshi keshen retinde kirgen. Ál-Qaraýın ýnıversıtiniń negizin 859 jyly Qaırýan qalasynan qonys aýdarǵan metsenat Muhammed ál-Fıhrıdiń qyzy Fatıma ál-Fıhrı qalaǵan. Ál-Qaraýın ýnıversıteti men meshiti Fes qalasynda ornalasqan. Ýnıversıtte grammatıka, sheshendik óner, logıka, medıtsına, matematıka, astronomııa, hımııa, tarıh jáne geografııa sekildi pánder oqytylǵan. Ál-Qaraýın ýnıversıtetinde ıslam aqıdasy men fıqhyna basa nazar aýdarylady. Sonymen qatar frantsýz jáne aǵylshyn tilderi de qatar oqytylady.
Источник: Aidos
