BAS MÚFTI MÁShHÚR JÚSIP MEShITINIŃ AShYLÝ RÁSIMINE QATYSTY (FOTO)
Búgin, qasıetti juma kúninde Aqmola oblysy Tselınograd aýdanynyń Qyzylsýat aýylynda Máshhúr Júsip meshitiniń ashylý rásimi ótti.
Igi is-sharaǵa Qazaqstan musylmandary dinı basqarmasynyń tóraǵasy Naýryzbaı qajy Taǵanuly qatysyp, izgi tilegin bildirdi.
«Qyzylsýat aýylyna aıryqsha kórik berip turǵan jańa meshitimizdiń ashylý jıynyna qosh keldińizder! Quthanamyz qutty bolsyn! Meshit – Allanyń jerdegi úıi. Adamzat balasynyń rýhanı turǵydan damýy men pendeniń tulaboıyna adamgershilik qundylyqtardy uıalatýda meshittiń orny qashan da mańyzdy. Qazaq topyraǵynda boı kótergen meshitterdiń tálim men taǵylymnyń, bilim men ǵylymnyń rýhanı ordasyna aınalǵany osynyń aıǵaǵy. Bul ómirge kelgen árbir pende óshpes mura qaldyryp ketsem dep armandaıdy. Sol óshpes muranyń biri jaıly Paıǵambarymyz (oǵan Allanyń sálemi men salaýaty bolsyn) óz hadısinde bylaı deıdi: «Kim jer betinde Allanyń úıin salýǵa atsalyssa, Alla Taǵala ol kisige jumaqtan oryn daıyndaıdy». Osy qulshylyq ordasynyń qurylysyn qolǵa alǵan dinimizdiń janashyr azamattaryna, Alla úıiniń boıkóterýine tileýlestik bildirgen jamaǵatqa Alla razy bolsyn!» dep atap ótti Naýryzbaı qajy Taǵanuly.
Bas múftı quttyqtaý sózinde elimiz boıynsha salynyp jatqan meshitterge Máshhúr Júsip Kópeıuly, Abaı Qunanbaıuly, Shákárim Qudaıberdiuly syndy tulǵalar esimi berilip jatqanyn, bul sheshim óskeleń urpaq úshin máńgi ónege bolatynyn jetkizdi.
Ashylý rásiminde Máshhúr Júsip urpaqtary men ǵalymdar izgi tilekterin bildirip, quttyqtaý lebizin bildirdi. QMDB Tóraǵasy jańa meshitte juma ýaǵyzyn aıtyp, elimizdiń ıgiligi men halqymyzdyń berekesin tilep, duǵa jasady.
