BAS MÚFTI MEDRESE TÚLEKTERINE DIPLOM TABYSTADY (FOTO)
Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly elordadaǵy «Astana» medrese-kolledjiniń 2023 jylǵy túlekterine dıplom tabystady.
«Jolyń bolsyn, jas túlek» sharasy qasıetti Quran aıattaryn oqýmen bastalyp, Bas múftı el amandyǵy úshin duǵa jasady. Budan keıin túlekterge dıplom tabystaý rásiminde QMDB Tóraǵasy Naýryzbaı qajy Taǵanuly shákirtterge nasıhat aıtyp, batasyn berdi.
«Bilim – dıplommen ólshenbeıdi. Sapaly mamandyq ıesi atanýmen aıqyndalady. Sizder dinı bilimdi, sharıǵatty oqyǵan soń jaýapkershilik arta túsedi. Hákim Abaı atamyz: «Adam balasynyń eń jamany – talapsyzdyq» deıdi. Al Ardaqty paıǵambarymyz Muhammed (oǵan Allanyń salaýaty men sálemi bolsyn) bilim týrasynda máshhúr hadısinde:
«Bilimdi talap etý árbir musylmanǵa – paryz» degen. Árıne, sizder talaptaný, eńbektený arqyly ilim jolyna tústińizder. Oqý – ınemen qudyq qazǵandaı dep beker aıtylmasa kerek. Endeshe osy jolda, dinı bilim alý jolyndaǵy ár kúnderińiz saýapqa toly bolsyn» dedi Bas múftı.
Aıta keteıik, bıyl «Astana» medrese-kolledjin 28 stýdent támámdady. Olardyń 19-y er bala, 9-y qyz bala. Sondaı-aq 4 er bala men 1 qyz bala úzdik dıplom ıegeri atandy. Marapattaý rásiminde Bas múftı mysyrlyq ustaz Muhammed Ibrahım Alı ash-Shavraýıge aıryqsha alǵysyn bildirip, syı jasady. Budan bólek QMDB Tóraǵasy respýblıkalyq medresearalyq olımpıada jeńimpazy Nazarbaı Ótegen men medrese qabyrǵasynda qurandy tolyq jattap qarı atanǵan Iztilekbaıhon Saǵynbaıǵa, úzdik stýdentterdiń biri Jandos Samenovke qarjylaı sertıfıkat tabystady. Atalmysh úsh shákirt te jýyrda ǵana Túrkııanyń «Hasekı» akademııasynda bilimin jalǵastyrýǵa joldama aldy.
