BAS MÚFTI MEKKEDEGI HALYQARALYQ KONFERENTsIIaDA BAIaNDAMA JASADY (FOTO)
Búgin qasıetti Mekke jerinde «Álemdegi din isteri, pátýa basqarmalarymen, sheıhtyqtarmen jáne sol sekildi mekemelermen baılanys» taqyrybynda ótip jatqan halyqaralyq konferentsııada QMDB Tóraǵasy, Bas múftı Naýryzbaı qajy Taǵanuly arnaıy baıandama jasady.
Bas múftı Dinı basqarmanyń 30 jyldan asa tarıhyndaǵy kóptegen musylman memleketteriniń dinı basqarmalarymen tyǵyz qarym-qatynas ornatqanyn, onyń ishinde Orta Azııa elderimen pátýa berý, musylman merekelerin bir mezette atap ótý syndy bastamalarǵa qol jetkizgenin aıtyp ótti.
«Búgingi qasıetti Mekkede bastalǵan konferentsııada álemdegi din isteri, onyń ishinde Islam dininiń qundylyǵy týraly aıta ketkendi jón sanap otyrmyn. Sońǵy kezderi Eýropanyń birqatar elderinde kúlli musylman qaýymy úshin qasıetti bolǵan Quran Kárimdi órteý oqıǵalary jıi oryn alýda. Qazaqstan musylmandary dinı basqarmasy mundaı shekten shyqqan áreketke alańdaýshylyq bildiredi jáne bassyzdyqqa jol bergen jandardyń isin qatań aıyptaıdy. Qazaqstan Respýblıkasynyń Prezıdenti Qasym-Jomart Toqaev bul oqıǵany qazirgi álemdegi jaǵdaıdy shıelenistirýge, halyqtar men memleketter arasyndaǵy senimge nuqsan keltirýge baǵyttalǵan arandatýshylyq áreket dep sanady. Bizdiń maqsatymyz – álem musylmandarynyń ar-ojdanyn qurmetteý jáne ózgege de qurmetpen qaraý» deı kele, zaman talabyna saı pátýa berýde atqarylyp jatqan jumystarǵa arnaıy toqtaldy.
«Búgingi tańda zaman aǵymyna saı jańa pátýalar qabyldanýda. Biz musylmandar bul rette qoǵam úderisinen tys qalmaı, talapqa saı jaýap berýge tıispiz. Óz tájirıbemizden aıtar bolsam sońǵy jyldary QMDB janyndaǵy Ǵulamalar keńesi Elektrondy saýda, aýktsonǵa qatysý, bırja, Elektrondy sıgaret, onlaın saýda, transplantatsııa úkimine qatysty pátýalar shyǵardy. Bul pátýalar qoǵamda tez qabyldanyp, qoldanysqa enip ketti. Sonymen qatar asyl dinimizdiń aıasyn keńeıtý maqsatynda Túrki memleketteriniń múftıler keńesi quryldy. Keńes otyrysynda musylman áleminiń aýyzbirshiligi, ózge din ókilderimen qarym-qatynas, pátýa berýdegi jańashyldyq taqyryptarynda pikir almasyp kelemiz. Alla Taǵala qasıetti Qurannyń «Álı Imran» súresinde: «Túp-túgel Allanyń jibine (dinine) jabysyńdar da bólinbeńder», – dep, múmınderge birlikte bolýdy buıyrǵan. Búgingi konferentsııada aıtylǵan basty oılar bizderdi biriktirip, ári qaraı kúlli musylmannyń birligi úshin jumys isteımiz degen oıdamyn. Barshańyzǵa Alla razy bolsyn!» – dedi QMDB Tóraǵasy.
Óz kezeginde Saýd Arabııasy Koroldiginiń Islam isteri, ýaǵyz jáne nasıhat mınıstri doktor Abdelatıf ben Abdýlazız ál ash-Sheıh mundaı basqosýdyń mańyzdy ekenin, birlikte bolý, dinı basqarmalardyń birigip pátýa shyǵarýy, ǵalymdardyń ózara jıý pikirlesýi qajet ekenin aıtyp ótti.
Aıta ketsek álemniń 85 elinen 120-dan asa múftıler men ǵalymdar qatysyp jatqan jıynda sondaı-aq halyqaralyq baılanysty arttyrý, dinı Ekstremızmmen kúres, pátýa berý isin jetildirý taqyryptarynda baıandamalar jasaldy.
