Bas múftı meshit jamaǵatymen júzdesti (FOTO)
Búgin «Ábý Nasyr ál-Farabı» meshitinde Qazaqstan musylmandary dinı basqarmasynyń Tóraǵasy, Bas múftı Naýryzbaı qajy Taǵanuly jamaǵatpen júzdesti.
Juma namazynyń aldynda Bas múftı jamaǵatqa qasıetti Erejep aıynyń qadir-qasıetin aıtyp, Ramazan aıyna daıyndyqty qazirden bastaý kerektigin atap ótti. QMDB Tóraǵasy óz sózinde: Erejep aıy – Quran Kárimde baıandalǵandaı Allanyń qasynda erekshe qurmetke ıe bolǵan qasıetti tórt aıdyń biri. Bul jóninde Jaratqan Haq Taǵala «Táýbe» súresiniń 36-aıatynda: «Rasynda Allanyń qasynda kókter men jerdi jaratqaly Allanyń kitabyndaǵy aılardyń sany on eki. Bulardyń tórteýi qurmetti aılar» - degen.
Paıǵambarymyz (oǵan Allanyń salaýaty men sálemi bolsyn) bylaı degen: «Jyl on eki aıdan turady. Bulardyń tórteýi – qurmetti aılar. Onyń úsheýi birinen keıin biri keledi. Bul aılar zulqaǵda, zulhıjja, muharram. Tórtinshisi bolsa, erejep». Árbir musylman pendege bul aılardy qadirleı bilýi mindet bolyp sanalady» deı kele, erejep aıynda qulshylyǵymyzdy qýattap, ımanymyzdy arttyrý kerek ekenin tilge tıek etti.
Sondaı-aq, Naýryzbaı qajy Taǵanuly el birligi, aýyzbirshilik, beıbit kúnniń mańyzy jaıynda jamaǵatqa nasıhat aıtty. Bas múftı jamaǵatpen birge elimizdiń yntymaq, birligi úshin, el tynyshtyǵy úshin duǵa jasady.
