Bas múftı mınıstrlikte qajylyq boıynsha basqosýǵa qatysty (FOTO)
2018 jylǵy 8 tamyzda Darhan Káletaevtyń tóraǵalyǵymen qajylyqqa baratyn qazaqstandyqtardyń jolǵa shyǵýyn uıymdastyrý máseleleri boıynsha otyrys ótti.
Otyrysqa Qazaqstan musylmandary dinı basqarmasynyń basshylyǵy jáne múddeli memlekettik organdardyń ókilderi, sondaı-aq «Scat» jáne «Fly Nas» áýekompanııasynyń ókilderi qatysty.
Kezdesý barysynda qajylyq maýsymynda qazaqstandyq azamattardyń qajylyqqa barý jáne kelý tártibi pysyqtaldy, qajylardy tasymaldaıtyn áýekompanııalardyń daıarlyǵy, sonyń ishinde ushaqtardyń ýaqytyly ushýyn qamtamasyz etý, sondaı-aq mindetti ekpe egý (vaktsınatsııa) rásimi men vıza alý máseleleri talqylandy.
Darhan Káletaev Qazaqstan azamattarynyń zańdy múddeleri men qaýipsizdigin uıymdastyrý jáne qajylyq kezinde qajylyqqa barǵandar úshin qolaıly jaǵdaılar jasaý boıynsha tıisti sharalardy qabyldaý qajettiligine basa nazar aýdardy.
Qazaqstan musylmandary dinı basqarmasy Saýd Arabııasy Koroldiginiń Qajylyq isteri jónindegi mınıstrligimen jyl saıyn kelisim jasasyp, sonyń negizinde bıylǵy jyly 3 myń adamǵa kvota bólindi.
Bıyl, qajylyqty qadaǵalaý men uıymdastyrý úshin Mınıstrlik pen QMDB tarapynan 14 adamnan turatyn qajylyq mıssııasy quryldy: QMDB – 7 ókil, BAQ – 3 ókil, QR Densaýlyq saqtaý mınıstrliginen 2 medıtsına qyzmetkeri jáne QR Qoǵamdyq damý mınıstrliginen – 2 ókil.
Barlyq qajylyqqa attanýshylar qajylyqty uıymdastyrýǵa qatysqan 18 qazaqstandyq týrıstik kompanııaǵa bekitildi.
Qazaqstan men Saýd Arabııasynyń áýekompanııalary 50/50 úles arqyly ushýdy uıymdastyrady. Saýd Arabııasy tarapynan qazaqstandyqtardyń qajylyqqa ushyp barýyn uıymdastyrý úshin «Fly Nas» áýekompanııasy belgilendi. Qazaqstan tarapynan ótken jyldan beri QR Qoǵamdyq damý mınıstrliginiń qoldaýymen qajylyqqa attanǵandardy tasymaldaý boıynsha qyzmet kórsetýdi «SCAT» áýekompanııasy júzege asyrady.
Qajylyq paryzyn óteıtin qazaqstandyqtar Saýd Arabııasyna 9-15 tamyz aralyǵynda baryp, 1 qyrkúıekke deıin elge oralady.
Atalǵan otyrysta qajylyqqa attanatyn qazaqstandyqtarǵa ekpe egý máselelerine erekshe nazar aýdaryldy. Osy jyly Qazaqstannyń 5 qalasynyń 8 medıtsınalyq ortalyǵynda bir ýaqytta ekpe egý rásimi (vaktsınalaý) júrgiziletin bolady. Qajylyqqa attanatyndar úshin ekpe baǵasy 28 myń teńgeni quraıdy.
Qoǵamdyq damý mınıstrligi 2017 jyly Dinı týrızm salasynda týroperatorlyq qyzmetti júzege asyrý qaǵıdalary bekitkenin aıta ketken jón.
Atalǵan qaǵıdalar Qazaqstan Respýblıkasy azamattarynyń qajylyqqa barýyn uıymdastyrý protsessterin retteýdi qamtamasyz etedi. Sonymen birge atalmysh quqyqtyq aktini engizý qajylyq paryzyn ótep jatqan Qazaqstan azamattarynyń destrýktıvti dinı ıdeologııanyń yqpalyna túspeýine múmkindik beredi.
Otyrys qorytyndysy boıynsha jaýapty organdarǵa qajylyqqa barý boıynsha barlyq uıymdastyrýshylyq máselelerdi sheshý jóninde usynystar berildi.
