Bas múftı Mysyrda oqyp jatqan qazaqstandyq stýdenttermen kezdesti (FOTO)
QMDB Tóraǵasy, Bas múftı Naýryzbaı qajy Taǵanuly bastaǵan delegatsııa Mysyr astanasy Kaırde bilim alyp jatqan bir top qazaqstandyq shákirtpen kezdesti.
«Bilim jáne ıhsan» taqyrybynda ótken kezdesýge Bas múftımen birge QMDB Tóraǵasynyń orynbasary Sansyzbaı Qurbanuly, Qazaqstannyń Mysyr Arab Respýblıkasyndaǵy Tótenshe jáne ókiletti elshisi Qaırat Lama Sharıf jáne Mysyrdaǵy «Talaba» qaýymdastyǵynyń jetekshisi Rýslan Serǵazıev qatysty.
Alǵash bop sóz alǵan Bas múftı rýhanı kezdesýdiń mán-mańyzyna toqtala kelip, Dinı basqarmanyń qazirgi jumys baǵyttaryn atap ótti.
«Bizdiń bir ǵana Otanymyz bar. Ol – táýelsiz Qazaqstan. Qazaqstanda týyp, ósip-óngen azamattyń boryshy – halqyna qyzmet etý, eline eńbek sińirý. Otanymyz qandaı qadirli bolsa, onyń azamaty da sondaı qadirli. Hákim Abaıdyń «Sen de bir kirpish dúnıege, ketigin tap ta bar qalan» degen. Biz qashan, qaı jerde júrsek te, elimizdiń, otbasymyzdyń, urpaǵymyzdyń bolashaǵy úshin aıanbaı eńbek etýimiz kerek. Qoǵamnyń damýyna úles qosýda belsendilik tanytýǵa tıispiz. Patrıottyq sezimdi, týǵan jerdiń abyroıyn birinshi orynǵa qoıyńyzdar. Múftııat dinı bilim jolynda júrgen sizderge qashan da qoldaý kórsetedi. Allaǵa shúkir, elimizde meshit sany artyp keledi. Sol meshit, medreselerge ózderińiz sekildi jańa býyn, bilimdi jastar kerek» dedi Bas múftı.
Sonymen qatar kezdesýde elshi Qaırat Lama Sharıf shákirtter eskerýi tıis birneshe máselelerdi kóterdi. Sonyń biri – árbir kýrsty tolyq aıaqtaǵan soń onyń dıplomyn kezeń-kezeńmen alý. Óıtkeni mundaǵy stýdentter bakalavr, magıstratýra bitirgenimen ony dáleldeıtin qujaty joq ekenin aıtty. Sol qujattardy berý máselesin kóteretinin jetkizdi.
Shákirttermen júzdesý barysynda naıb múftı, Sharıǵat jáne pátýa bóliminiń meńgerýshisi Sansyzbaı Qurbanuly bilim alýdaǵy erekshelikter, ustazǵa qurmet, týǵan jerdiń qadiri, ultqa qyzmet týrasynda nasıhatyn jetkizdi. Al «Talaba» qaýymdastyǵynyń jetekshisi Mysyrda atqarylǵan jumystardy qorytyndylap, josparlaryn bólisti.
