Bas múftı «Naýan haziret» meshitinde juma ýaǵyzyn aıtty (FOTO)
Búgin Aqmola oblysyna eki kúndik jumys saparymen kelgen QMDB Tóraǵasy, Bas múftı Naýryzbaı qajy Taǵanuly Kókshetaý qalasynyń ortalyq «Naýan Haziret» meshitinde jamaǵatqa juma ýaǵyzyn aıtty.
Bas múftı eń aldymen din men dástúrge berik bolý, ımandy saqtaý, ultty súıý jóninde nasıhatyn jetkizdi.
«Bizdi joqtan bar etken Jaratqannyń buıryǵyn oryndaý – barshamyzǵa mindet. Onyń elshisinen (oǵan Allanyń salaýaty men sálemi bolsyn) jetken amanatqa barynsha qııanat jasamaýǵa tıispiz. Abaı atamyz «Árbir aqyldy adamǵa ıman paryz, árbir ımandy adamǵa ǵıbadat paryz» degen. Endeshe siz ben bizdiń Allaǵa shúkirshiligimiz kóp bolýy qajet. Bizge Alla Taǵala táýelsizdikti berdi. Burynǵy dástúr, ǵurpymyz qaıta oraldy. Meshitterimiz esikterin aıqara ashty. Sondyqtan osynaý baıtaq dalamyzdy kózdiń qarashyǵyndaı saqtap, birligimizdi bekem ustaıyq», – dedi Bas múftı.
Sondaı-aq, QMDB Tóraǵasy budan bólek ǵaıbat taqyrybynda da ýaǵyz aıtyp, jamaǵatpen birge juma namazyn oqydy. Arnaıy quran aıattary oqylyp, el men jerdiń tynyshtyǵy úshin duǵa jasaldy.
